Edicioni i dytë i Festivalit “Mitrovica International Jazz Days” është në përgatitje e sipër.
Organizatorët ende s’kanë bërë të ditur për datat e ngjarjes, por që kanë shpalosur disa nga aktivitetet që pritet të ndodhin. Njëra nga to është punëtoria e cila organizohet për muzikantët e rinj.
“A jeni një muzikant i ri dhe i pasionuar për të përmirësuar aftësitë tuaja dhe për të shfaqur talentin tuaj? Kemi kënaqësinë t’ju ftojmë të merrni pjesë në një mundësi unike dhe emocionuese në Mitrovica International Jazz Days, të mbështetura nga Misioni i OSBE-së në Kosovë me rastin e 25-vjetorit të Misionit në Kosovë”, thuhet në thirrje të njoftimit.
Përveç tjerash, ky edicion do ta ketë edhe punëtorinë me jazz muzikantët e rinj nga Ballkani Perëndimor, nën monitorimin e Kinga Gtyk.
“Jemi të emocionuar të njoftojmë se basistja e bujshme, Kinga Gtyk, do të na bashkohet si mentore për punëtorinë e ardhshme të muzikantëve të xhazit të Ballkanit Perëndimor në Mitrovicë! E njohur për talentin e saj të jashtëzakonshëm dhe performancat dinamike, Kinga Gtyk është një nga basistët më me ndikim të brezit të ri”, njofton festivali. /Kosovatimes/
