Kryetari i Partisë Demokratike të Kosovës, Memli Krasniqi, ka përshëndetur xhudistët Akil dhe Nora Gjakova, për paraqitjet e dinjitetshme në Olimpiadën e Parisit.
“Me pak më shumë fat, Akil Gjakova sot do të kthehej me medalje nga Lojërat Olimpike “Parisi 2024”. Megjithatë, një paraqitje fantastike, në eventin më të madh sportiv në botë ku finesat vendosin, duke treguar përgatitjen dhe kualitetin e tij të jashtëzakonshëm prej sportisti elitar”, thotë Krasniqi.
Me apo pa medalje, vetëm krenari për këtë djalosh, thotë ai.
“Po aq krenarë jemi edhe me Nora Gjakovën, motrën e tij, e cila u bë sportistja e vetme që përfaqëson Kosovën në tri Olimpiada të ndryshme”, shkruan Krasniqi në Facebook.
Familja Gjakova, sipas tij, i ka dhënë shumë dinjitet e krenari xhudos dhe Kosovës, “për çka u jemi shumë mirënjohës”. “Faleminderit Nora dhe Akil. Suksese në paraqitjet tuaja të ardhshme”, shkruan Krasniqi. /Kosovatimes/
