Duke marrë parasysh sezonin veror dhe temperaturat e larta që rrisin rrezikun e zjarreve, autoritetet në Kosovë po ndërmarrin masa për të parandaluar dhe menaxhuar këto situata.
Në një takim të mbajtur më 31 korrik 2024, përfaqësues të Policisë së Kosovës, Agjencisë për Menaxhimin e Emergjencave (AME), Ministrisë së Mjedisit dhe Planifikimit Hapësinor dhe Infrastrukturës, si dhe Ministrisë së Bujqësisë Pylltarisë dhe Zhvillimit Rural, u diskutua për modalitetet e veprimit në rast të raportimeve apo identifikimit të zjarreve.
Autoritetet theksuan se zjarrvëniet e qëllimshme dhe ato nga pakujdesia janë vepra penale të sanksionuara me ligj.
U përmend gjithashtu mundësia e përjashtimit nga programet e subvencionimit për pronarët e tokave që djegin sipërfaqet e tyre.
Apeli i autoriteteve shkon drejt qytetarëve, veçanërisht pronarëve të tokave, që të shmangin zjarrvëniet dhe të raportojnë çdo rast të dyshuar.
Policia e Kosovës premtoi bashkëpunim të ngushtë me autoritetet përkatëse për hetimin dhe ndjekjen penale të çdo rasti të zjarrvënieve që rrezikon sigurinë dhe mjedisin. /Kosovatimes/
