Sot në pikën transmetuese “Maja e Gjelbër” në komunën e Gjilanit, është instaluar me sukses sistemi i ri i antenave dhe transmetuesve për dy kanalet e Radio Kosovës.
Me këtë investim, është rritur për 16 herë fuqia shpërndarëse e sinjalit të dy kanaleve të Radio Kosovës, në rajonin e Anamoravës e më gjerë, në frekuencat 88.5 dhe 90.5 MHz.
Transmetuesit e rinj kanë kapacitet transmetimi prej 1,000 wat, ndërsa deri tani si pasojë e amortizimit dhe stërvjetërimit të pajisjeve, ishte transmetuar me vetëm rreth 90 wat, në kanalin e parë ndërsa rreth 40 wat, në kanalin e dytë.
Instalimi i pajisjeve të reja teknike mundëson zgjerimin e hartës së mbulueshmërisë dhe rritjen e cilësisë së transmetimit.
Drejtori i Radio Kosovës, Arsim Halili, i cili vizitoi nga afër punimet në Majën e Gjelbër, tha se sot kanë përuruar edhe një korridor të shpërndarjes së sinjalit tokësor, përmes frekuencave FM, që mundëson qasje shumëfish më të lartë të dëgjuesve të të gjitha moshave dhe etnive nga rajoni i Anamoravës e më gjerë në informacionin dhe programet e dy kanaleve të Radio Kosovës.
Ai theksoi se pas 24 vjetësh mungese investimesh kapitale në Radio Kosovë, për më pak se një vit, po mbulojnë pothuajse tërë territorin e Kosovës me sinjal të radiove të transmetuesit publik, duke përmbushur edhe një obligim ligjor karshi taksapaguesve.
Me skemën e re programore dy kanalet e Radio Kosovës ofrojnë 24-orë program të larmishëm në gjuhën shqipe, serbe, boshnjake, turke dhe rome.
Dje, në pikën transmetuese në Cërnushë të Mitrovicë, është instaluar me sukses sistemi i ri i antenave dhe transmetuesve për dy kanalet e Radios me ç’rast është rritur për 50 herë fuqia transmetuese. Në vazhdën e investimeve kapitale, gjatë javës do të instalohen transmetues të rinj me fuqi prej 3,000 kilowatësh në pikën e Zatriqit që mbulon Rajonin e Dukagjinit.
Kujtojmë se në fillim të këtij viti janë instaluar transmetues të rinj prej 5KW për dy kanalet e Radio Kosovës në Golesh, prej ku është dhjetëfishuar fuqia transmetuese në pjesën qendrore të Kosovës dhe është instaluar sistem i ri i antenave në Zatriq ku është gjashtëfishuar fuqia transmetuese në rajonin e Dukagjinit.
