Veprimet e fundit të autoriteteve të Kosovës në veri të vendit, mund të ndikojnë që të mos hiqen masat e Bashkimit Evropian. Kështu u la të kuptohet nga prononcimi i zëdhënësit të BE-së, Peter Stano.
“Fakti që BE ka vendosur masat kundër Kosovës vitin e kaluar është reflektim i hapave që çuan në përshkallëzim. Tani shohim më shumë hapa të njëanshëm dhe më shumë veprime të pakoordinuara. Kjo nuk është në të vërtetë depërshkallëzim. Kjo çon në eskalim të mëtejshëm. Këtë duhet ta kuptojnë qartë ata që marrin vendime në Prishtinë”, deklaroi Stano, zëdhënës i BE-së.
Stano përsëriti se për Bashkimin Evropian e konsideron të njëanshëm, vendimin e Prishtinës zyrtare për mbylljen e nëntë degëve të Postës së Serbisë, në veri të Kosovës.
Të hënën në mbrëmje, BE doli me komunikatë ku mes tjerash u tha se një veprim i tillë shkel dialogun mes dy vendeve, që ndërmjetësohet nga Bashkimi Evropian.
Mbyllja e shërbimeve ekzistuese për serbët e Kosovës pa një marrëveshje të arritur paraprakisht, sipas cilësimeve në komunikatën e Brukselit, do të ndikojë negativisht në përditshmërinë dhe kushtet e jetesës së këtij komuniteti.
BE i ka bërë thirrje Qeverisë së Kosovës që të rishqyrtojë këtë vendim dhe të gjejë një zgjidhje të negociuar në kuadër të dialogut.
Të njëjtën thirrje e bëri edhe zëdhënësi Peter Stano.
“E kemi thënë shumë qartë se çfarë presim nga administrate Kurtit. Presim që ata ta rishqyrtojnë dhe ta trajtojnë këtë çështje në kuadër të dialogut të ndërmjetësuar nga BE-ja dhe të dalin me propozime që do të trajtonin ndikimin e mundshëm negativ të këtij vendimi në popullatën e veriut të Kosovës”, ka deklaruar Stano.
Ai tërthorazi përmendi, çështjen e masave, aplikimin e Kosovës për marrjes e statusit të kandidatit si dhe mjetet financiare nga Plani i Rritjes, si fusha ku Kosova ka probleme për shkak të veprimeve të autoriteteve vendore.
