Pas një suksesi pesëvjeçar në Shqipëri, Qendra “ALERT” njofton zgjerimin e saj në Kosovë, duke filluar aktivitetin e saj të plotë në mesin e muajit shtator 2024. Kjo Organizatë Joqeveritare, e themeluar në Tiranë në vitin 2019, ka si objektiv kryesor mbrojtjen e të drejtave të konsumatorëve dhe fuqizimin e tyre, duke mbuluar fusha të tilla si siguria ushqimore dhe joushqimore, tregtia online, edukimi financiar, dhe shumë të tjera.
Në një deklaratë të bërë, përfaqësuesit e Qendra “ALERT”t heksuan rëndësinë e kësaj zgjerimi, duke u shprehur: “Kjo është një nevojë imediate për mbrojtjen e konsumatorëve në Kosovë, por edhe në kuadër të proceseve të integrimit evropian dhe politikave që Kosova synon të zbatojë.”
Përveç aktiviteteve të saj në mbrojtjen e konsumatorëve, Qendra “ALERT” synon të promovojë dhe avokojë për qeverisje të mirë, mbrojtjen e mjedisit, dhe të drejtat e njeriut në Kosovë.
“Ne jemi të kënaqur që do të fillojmë një kapitull të ri në Kosovë dhe presim të bashkëpunojmë me komunitetin lokal për të avancuar interesat e konsumatorëve dhe për të siguruar të drejtat e tyre,” deklaruan ata.
Po ashtu, pritet që Emisioni Televiziv “ALERT”, i cili transmetohet në Shqipëri përmes Ora News, të fillojë së shpejti transmetimin edhe në Prishtinë, Kosovë, duke sjellë informacione të rëndësishme dhe duke rritur ndërgjegjësimin për çështjet e konsumatorëve në vend.
Qendra “ALERT” inkurajon të gjithë palët e interesuara të regjistrojnë kontaktet e reja të organizatës në databazat e tyre për të ndihmuar në promovimin dhe vizibilitetin e projekteve të përbashkëta në të mirë të Kosovës dhe qytetarëve të saj. /Kosovatimes/
