Lëvizja Vetëvendosje ka zhvilluar një aksion-konferencë para Prokurorisë Speciale të Kosovës, ku janë vendosur disa fotografi për prokurorë e gjyqtarë të cilët janë pensionuar dhe rasti i Astrit Deharit ende nuk ka përfunduar.
Sami Kurteshi nga Lëvizja Vetëvendosje në një konferencë për media ka theksuar se prokurori Afrim Shefkiu po del në pension pa përfunduar rastin e Astrit Dehari, duke thënë se ai e ka mbajtur rastin për më shumë së tri vjet.
“Ne si LVV e kem ftuar këtë konferencë për media, për të treguar një kronologji të rastit të Astrit Dehari, për veprimet dhe mos veprimet e prokurorisë së shtetit, përfshirë Prokurorinë Themelore, dhe atë Speciale”, deklaroi ai.
“Ne e kemi pasur një fushatë të deklarimeve të zyrtarëve të ndryshëm rreth rastit, e që ishin të gjitha deklarime kontradiktore. Duke filluar nga Prokuroria e Shtetit, Shërbimi Korrektues, Policia e Kosovës dhe në fund vetë ministrja e Drejtësisë, Dhurata Hoxha”, tha Kurteshi.
Ai ka përmendur edhe disa medie në vend të cilat sipas tij kanë nxjerrë videoincizimet e Deharit para se ato t’i marrë Prokuroria si dhe, sipas tij për raportim jo korrekt. Ai ka kritikuar ish-prokurorin, Sylë Hoxha dhe prokurorin Afrim Shefkiu, që sipas tij edhe dy ditë do të dalë në pension pa e zbardhur rastin e Astrit Deharit.
“E ka ftuar ministren e Drejtësisë dhe e ka marrë në pyetje si dëshmitare, nga ajo nuk del asgjë. Nuk e ka dhënë asnjë urdhër për hapje të hetimeve ndaj urdhërdhënësve, urdhërbartësve, ndaj zbatueseve dhe ndaj gjithë atyre që kanë qenë të involvuar në rastin e vrasjes së Astrit Deharit”, shtoi Kurteshi.
Në këtë konferencë të pranishëm ishin edhe familjarët e Astrit Deharit dhe avokati, Tomë Gashi.
Para Prokurorisë Speciale janë shpalosur edhe disa fotografi të rastit Dehari.
Astrit Dehari vdiq më 5 nëntor të vitit 2015 në qendrën e paraburgimit në Prizren në rrethana ende të paqarta.
