Kryeministri i Kosovës, Albin Kurti, priti në një takim të rëndësishëm Komandantin e KFOR-it, Özkan Ulutas, për të diskutuar mbi bashkëpunimin e vazhdueshëm ndërmjet institucioneve të sigurisë të Kosovës dhe misionit të NATO-s në vend.
Gjatë takimit, një nga temat qendrore ishte hapja e urës kryesore mbi lumin Ibër në Mitrovicë.
Kryeministri Kurti theksoi se kjo hapje është “një veprim i drejtë, i nevojshëm dhe i dobishëm” për të gjithë qytetarët.
Ai e njoftoi Komandantin e KFOR-it për zhvillimet e fundit lidhur me punimet në urë dhe rezultatet preliminare të vlerësimit të qëndrueshmërisë së saj, të dorëzuara nga operatori ekonomik tek Ministria e Mjedisit, Planifikimit Hapësinor dhe Infrastrukturës.
Kurti rikujtoi dhe takimin publik të mbajtur më 8 gusht në Mitrovicën e Veriut, ku u diskutua për hapat e mëtejshëm në drejtim të hapjes së urës.
“Liria e lëvizjes dhe sundimi i ligjit, paqja dhe siguria janë të gjitha të mundura bashkë dhe të duhura,” tha ai.
Një tjetër temë e rëndësishme e takimit ishte ballafaqimi me zjarret që kanë përfshirë disa zona të vendit gjatë këtyre ditëve të nxehta vere. Në këtë kontekst, u diskutua dhe ndihma që KFOR-i mund të ofrojë për shuarjen e tyre.
Në takim, Kryeministri Kurti ishte i shoqëruar nga zëvendëskryeministri i parë, Besnik Bislimi, ministri i Administrimit të Pushtetit Lokal, Elbert Krasniqi, dhe zëvendësdrejtori i përgjithshëm i Policisë së Kosovës, Fehmi Hoti. Në fund, ai e falënderoi komandantin Ulutas për bashkëpunimin dhe komunikimin e rregullt që KFOR-i ka pasur me institucionet e Kosovës. /Kosovatimes/
