Ministri i Administrimit të Pushtetit Lokal, Elbert Krasniqi, i ka reaguar emisarit të Bashkimit Evropian për dialogun Kosovë – Serbi, Miroslav Lajçak, lidhur me çështjen e hapjes së urës mbi lumin Ibër për vetura.
Ministri Krasniqi e ka pyetur Lajçakun se çfarë ndodhi që Bashkimi Evropian e ndryshoi qëndrimin nga “hapja e urës pa vonesa të mëtutjeshme” në “duhen më tepër bisedime”.
“I dashur Miroslav Lajçak, BE-ja vetëm së fundi ka thënë se çështja e urës së Mitrovicës duhet të diskutohet në dialog. Më herët, e ka cekur vazhdimisht se ‘ura duhet të hapet për qarkullimin e automjeteve pa vonesa të mëtutjeshme’, sipas Raportit për Vendin (CR) mes viteve ’18-’22. Është e qartë se ka një ndryshimi në qëndrimin e BE-së për të njëjtën çështje. Kështu, do të ishte korrekte t’u thuash njerëzve pse ky ndryshim? Çfarë ka ndryshuar nga viti 2023 për dallim me 2022 për BE-në që të kalojë nga ‘hapja e urës pa vonesa të mëtejshme’ te ‘duhen më shumë bisedime?’”, ka shkruar Krasniqi në platformën “X”.
Dje Lajçak në një postim në “X”, ka thënë se BE-ja vazhdimisht e ka theksuar se “çështja e urës së Mitrovicës duhet diskutuar në dialog”.
“BE-ja ka theksuar vazhdimisht se çështja e urës së Mitrovicës duhet të diskutohet në Dialogun e lehtësuar nga BE-ja. Pretendimet se BE-ja është kundër hapjes së urës ose ka ndryshuar pozicionin e saj janë çorientuese”, ka shkruar ai.
Sipas tij, imponimi i një vendimi kundër vullnetit të qytetarëve të prekur nuk kontribuon në normalizimin e marrëdhënieve.
“Qeverisja e mirë kupton ndjeshmërinë e pakicës. Se si do të zbatohet marrëveshja për hapjen e urës do të diskutojmë në takimin e ardhshëm në Bruksel”, ka shkruar ai. /Kosovatimes/
Dear @MiroslavLajcak, the EU has only recently said that the issue of the Mitrovica bridge must be discussed in the Dialogue. Before, it had stated repeatedly that "the bridge should be opened to vehicle traffic without further delays or obstruction", as per CRs between '18-'22.
— elbertkrasniqi (@elbertkrasniqi) August 15, 2024
