Javën e ardhshme nis sesioni i seancave të vjeshtës në rastin Thaçi, Veseli, Krasniqi e Selimi, një proces që tashmë ka hyrë në vitin e katërt të mbajtjes në paraburgim të ish-krerëve të Ushtrisë Çlirimtare të Kosovës.
Që nga nisja e Gjykimit, janë dëgjuar dëshmitarë në seanca të hapura, por më shumë të mbyllura për publikun. Avokati Taulant Hodaj pret që për gjykimi i katërshes së UÇK-së, në shkallën e parë të përfundojë brenda një viti.
“Tani edhe prokuroria edhe mbrojtja ose duhet të merren vesh (s’kanë nevoje një numër të dëshmitarëve t’i ftojnë) ose prokuroria do të tërhiqet nga një numër i konsiderueshëm i dëshmitarëve, në mënyrë që rasti të procedohet më shpejtë. Gjykata Speciale është rast ‘sui generis’ në gjithë gjykatat e botës, ku më shumë gjykime nuk janë publike, sesa që janë, nuk besoj që ndonjë gjykatë në botë ka pasur më shumë mbyllje, sesa Gjykata Speciale”, tha Hodaj.
Se procedura po zhvillohet me ritëm të ngadalshëm, e thonë edhe nga Fondi për të Drejtën Humanitare në Kosovë.
“Unë mendoj që ekziston një lloj kritike nga publiku për këtë gjykatë sepse në fund të ditës nuk po e kuptojmë se cilat janë dëshmitë e sakta apo cilat janë ato dëshmi në bazë të cilave mund të dënohen të pandehurit, sidomos procesi kundër Thaçit dhe të tjerëve është jo transparent dhe nuk dimë se si janë përshkrua krimet e pretenduara në aktakuzë”, tha Bekim Blakaj , Fondi për të Drejtën Humanitare.
Si monitorues në Institutin e Kosovës për Drejtësi, thonë se po ballafaqohen edhe me vështirësi gjatë këtij procesi.
“Ne kemi treguar se prokuroria ka qenë shumë e ngadalshme në ngritjen e aktakuzave dhe të veprimeve të tjera që ka bërë , po ashtu vazhdimisht kërkojmë të ketë transparencë më të madhe e cila nuk do të ndikoj në pengimin ose dëmtimin e procedurave gjyqësore dhe kemi treguar edhe për probleme teknike që ne si monitorues kemi problem në paraqitjen e gjendjes reale nga ajo që është duke u zhvilluar në këto procese në gjykatën e Hagës”, tha Astrit Kolaj, IKD.
Gjykimi i Thaçit, Krasniqit, Veselit e Selimit ka filluar më 3 prill 2023.
