Kryetari i Bordit të Radiotelevizionit të Kosovës (RTK), Besnik Boletini, ka njoftuar për dorëheqjen e tij nga pozita e kryetarit dhe anëtarit të Bordit të RTK-së. Vendimi i tij vjen pas përpjekjeve të vazhdueshme për të adresuar skandalin e publikimit të një artikulli të paverifikuar, i cili ka shkaktuar polemika të mëdha brenda dhe jashtë institucionit.
Në një deklaratë publike, Boletini theksoi se përkundër përpjekjeve të tij për të siguruar që raporti i komisionit për këtë rast të adresohej nga udhëheqja e RTK-së, ai nuk gjeti mbështetje nga disa anëtarë të Bordit.
Sipas tij, raporti kishte gjetje të qarta për shkelje profesionale, por zëvendësdrejtori Adi Krasta, i cili mban përgjegjësitë e drejtorit, nuk ka marrë masat e nevojshme për të ndëshkuar përgjegjësit e skandalit.
Boletini sqaroi se tentativat e tij për të emëruar një ushtrues detyre që do të adresonte situatën, u bllokuan nga disa anëtarë të Bordit, duke përfshirë Radojica Mrdjinac dhe Fatime Lumi. Ai gjithashtu theksoi se përçarjet brenda Bordit, që u shfaqën që nga mbledhja e datës 23 korrik, kanë penguar marrjen e masave të duhura për të trajtuar këtë rast të ndjeshëm.
“Për mua, të jesh në krye të transmetuesit publik është një privilegj, por edhe një përgjegjësi e madhe,” deklaroi Boletini, duke shtuar se dorëheqja e tij ishte një vendim i vështirë, por i domosdoshëm në këto rrethana.
Ai theksoi se nuk mund të qëndronte në një pozicion ku duart e tij ishin të lidhura dhe masat e nevojshme nuk po merren.
Boletini gjithashtu foli për progresin që RTK-ja ka bërë gjatë dy viteve të fundit, duke përmendur sfidat dhe arritjet e institucionit.
“Plani i reformës ka qenë i qartë dhe duhej edhe pak që RTK-ja ta bëjë hapin e madh,” tha ai, duke shpresuar që ata që mbeten në institucion do të vazhdojnë përpjekjet për të përmirësuar RTK-në.
Dorëheqja e Boletinit vjen në një moment kritik për RTK-në, me sfida të mëdha përpara, përfshirë ruajtjen e pavarësisë dhe integritetit të tij si transmetues publik. /Kosovatimes/
