Anëtarët e Forcave Paraushtarake të Mbështetjes së Shpejtë (RSF) të Sudanit vranë të paktën 85 njerëz, duke përfshirë gra dhe fëmijë, gjatë një sulmi në një fshat në pjesën qendrore të vendit, sipas dëshmitarëve dhe zyrtarëve lokalë.
RSF filloi të sulmojë fshatin Galgani në provincën qendrore Senar në fund të korrikut dhe javën e kaluar luftëtarët e RSF “hapën zjarr ndaj fshatarëve të paarmatosur” pasi ata rezistuan ndaj përpjekjeve për të rrëmbyer dhe sulmuar seksualisht gra dhe vajza, tha ministria e Punëve të Jashtme Sudani.
Në njoftim thuhet se me atë rast janë plagosur mbi 150 persona.
Duke përshkruar sulmin prej disa orësh, tre banorë thanë se qindra luftëtarë të RSF-së sulmuan fshatin të enjten, duke plaçkitur dhe djegur shtëpi dhe prona.
Deri të premten, një spital lokal kishte marrë të paktën 80 trupa, duke përfshirë 24 gra dhe fëmijë, tha mjeku, i cili foli në kushte anonimiteti për shkak të frikës për sigurinë e tij. Askush nga RSF nuk iu përgjigj një kërkese për koment.
RSF është akuzuar vazhdimisht për masakra, përdhunime dhe shkelje të tjera të rënda të ligjit në të gjithë vendin. Në qershor, RSF sulmoi kryeqytetin provincial të Sinar, qytetin e Singa, rreth 350 kilometra në juglindje të Khartoum. Ata plaçkitën tregun kryesor të qytetit dhe morën spitalin kryesor, duke detyruar mijëra njerëz të largoheshin.
Sulmi i fundit vjen ndërsa SHBA po udhëheq përpjekjet për të rinovuar bisedimet e paqes midis ushtrisë zyrtare dhe RSF-së. Bisedimet, të bojkotuara nga ushtria, filluan javën e kaluar në Zvicër.
Në negociatat morën pjesë diplomatë nga Arabia Saudite, Egjipti, Emiratet e Bashkuara Arabe, Bashkimi Afrikan dhe Kombet e Bashkuara. RSF dërgoi një delegacion në Gjenevë, por nuk mori pjesë në takime.
Sudani është kapur nga dhuna që nga prilli 2023, kur tensionet midis ushtrisë zyrtare të udhëhequr nga gjenerali Abdel Fattah Burhan dhe Forcave Paraushtarake të Mbështetjes së Shpejtë (RSF) nën komandën e gjeneralit Mohamed Hamdan Dagalo – u përshkallëzuan në konflikt të hapur të armatosur.
Që atëherë, luftimet janë përhapur në disa pjesë të vendit dhe kryeqyteti Khartoum dhe Omdurman fqinjë janë bërë një fushë beteje urbane. Konflikti ka nxitur gjithashtu dhunën etnike në rajonin perëndimor të Darfurit të Sudanit.
Sipas të dhënave të fundit të OKB-së, më shumë se 10 milionë njerëz janë zhvendosur në Sudan për shkak të luftimeve, nga të cilët 4.3 milionë janë të zhvendosur brenda Sudanit dhe mbi dy milionë janë larguar në vendet fqinje. Agjencia e OKB-së për refugjatët pretendon se në Sudan po shpaloset një “krizë e paimagjinueshme humanitare”.
