Safet Kabashaj, anëtar i Bordit të Radiotelevizionit të Kosovës (RTK), ka dhënë dorëheqjen nga posti i tij, duke publikuar një letër të gjatë dhe emocionale ku shpjegon arsyet që e shtynë të marrë këtë vendim. Kabashaj njoftoi dorëheqjen e tij përmes një emaili drejtuar kolegëve të tij, ku ai shprehu zhgënjimin e tij për dështimin në përpjekjet për të rikonsoliduar kredibilitetin e RTK-së dhe për të adresuar shkeljet e fundit që kanë dëmtuar reputacionin e këtij institucioni.
Në letrën e tij, Kabashaj theksoi se dorëheqja vjen si pasojë e mungesës së përparimit në përmbushjen e objektivave që ai kishte parashikuar kur mori postin në dhjetor 2021.
Ai theksoi se shpresat e tij për krijimin e një RTK të pavarur dhe kredibile nuk janë realizuar, për shkak të mungesës së vullnetit politik dhe mosangazhimit të duhur të Bordit për të zgjidhur krizat që kanë përfshirë këtë institucion.
Kabashaj gjithashtu kritikoi papërgjegjshmërinë dhe komoditetin e Bordit për mënyrën se si është menaxhuar situata me ish-Drejtorin e Përgjithshëm të RTK-së, duke theksuar se vendimet e Bordit kanë shkaktuar dëm më të madh sesa dobi për institucionin dhe për lirinë e medias në Kosovë.
Ai shprehu keqardhje që nuk arriti të ndihmojë në konsolidimin e RTK-së në kuptimin e financimit të qëndrueshëm, pronës së përhershme dhe pavarësisë editoriale.
Në përfundim të letrës së tij, Kabashaj uroi që përbërja e ardhshme e Bordit të RTK-së të arrijë suksesin që ai nuk mundi ta përmbushë dhe falënderoi kolegët për bashkëpunimin e deritanishëm. /Kosovatimes/
