Presidentja e Kosovës, Vjosa Osmani, i ka dorëzuar me krenari flamurin e Kosovës paraatletit Grevist Bytyqi, i cili këtë muaj do të udhëtojë në Paris për të përfaqësuar vendin në Lojërat Paralimpike “Paris 2024”. Gjatë ceremonisë, Presidentja Osmani shprehu mbështetjen e plotë të popullit të Kosovës për Bytyqin, duke theksuar se kjo përfaqësim është një moment historik për Kosovën.
“Me këtë flamur në duart e tua, gjithë Kosova është me ty, brohorasim për ty. Jemi krenarë që Kosova do të përfaqësohet në Lojërat Paralimpike. Anëtarësimi ynë në Komitetin Paralimpik ishte një sukses historik, dhe jam e bindur se do të përfaqësosh Kosovën me dinjitet, duke shkëlqyer si çdo herë në arenën ndërkombëtare,” theksoi Osmani.
Më 28 gusht, Grevist Bytyqi dhe ekipi i Komitetit Paralimpik të Kosovës do të debutojnë në Lojërat Paralimpike “Paris 2024”, duke shënuar një kapitull të ri në historinë sportive të vendit. /Kosovatimes/
