Rotary Club Peja, me mbështetjen e Fondacionit Rotary në ShBA dhe partneritetin me Distriktet dhe Klubet Rotary nga Kalifornia, Uellsi, Franca, Anglia, Japonia dhe Suedia, ka ndarë 143,202.75 USD për projektin “Energjia e Ripërtëritshme për Ambient më të Pastër në Spitalin e Pejës”.
Ky projekt, i cili synon përmirësimin e ambientit dhe shëndetit në Spitalin Rajonal të Pejës, përfshin instalimin e paneleve fotovoltaike për prodhimin e energjisë së pastër elektrike. Me këtë investim do të eliminohet përdorimi i mazutit, një ndotës i madh i ambientit, i cili deri më tani është përdorur për prodhimin e energjisë për lavanderinë e spitalit.
Rotary Club Peja ka shqyrtuar me kujdes kërkesën e menaxhmentit të spitalit dhe ka marrë parasysh shqetësimet e banorëve përreth, të cilët kanë vuajtur nga pasojat shëndetësore të ndotjes nga djegia e mazutit. Projekti është vlerësuar si një hap i rëndësishëm drejt përmirësimit të cilësisë së jetës në Pejë, duke siguruar një ambient më të pastër dhe më të shëndetshëm për stafin, pacientët dhe komunitetin lokal.
Kryetari Themelues i Rotary Club Peja, Dr. Neshad Asllani, i cili ka një besim të thellë në Fondacionin Rotary dhe miqësi të ngushta me Rotarianë nga mbarë bota, ka luajtur një rol kyç në sigurimin e përkrahjes ndërkombëtare për këtë projekt. Mbikëqyrja e implementimit i është besuar Rotarianit Gentian Lluka, i cili ka iniciuar këtë projekt dhe është në kontakt të vazhdueshëm me menaxhmentin e spitalit për të siguruar që çdo gjë të realizohet sipas planit.
Ky projekt, një shembull i shkëlqyer i bashkëpunimit ndërkombëtar dhe përkushtimit për të mirën e komunitetit, përfaqëson një hap të madh përpara drejt një të ardhmeje më të pastër dhe më të qëndrueshme në Pejë. /Kosovatimes/
