Ukraina kreu një sulm me dron në një aeroport ushtarak pranë Volgogradit, ndërsa njoftoi gjithashtu kapjen e një fshati në rajonin Kursk të Rusisë. Ndërsa forcat ruse po bëjnë përparim në rajonin e Donjeckut , Kievi vazhdon ofensivën e tij ambicioze me drone me rreze të gjatë, duke e bërë bazën ajrore Marinovka objektivin e fundit .
Sulmi ndodhi rreth orës tre të mëngjesit, gjë që u konfirmua nga guvernatori i rajonit të Volgogradit, Andrey Boçarov . Sipas banorëve vendas, një seri shpërthimesh tronditën zonën dhe shpërthimet vazhduan disa orë më vonë. Një re e madhe tymi i zi mbuloi një pjesë të rajonit – shkruan The Guardian .
Shërbimi ukrainas i sigurisë SBU konfirmoi se objektivi i sulmit ishte baza ajrore Marinovka, e vendosur rreth 70 kilometra në perëndim të Volgogradit, afër qytetit të Kalach-on-Don. Baza është shtëpia e afërsisht 30 avionëve luftarakë Su-34 dhe Su-35, të cilët bombardojnë rregullisht pozicionet e Ukrainës në një distancë prej rreth 450 kilometrash. Edhe pse nuk është e qartë se sa avionë janë dëmtuar, burimet ruse bëjnë me dije se dëmi është i konsiderueshëm dhe sipas një dëshmie, “i gjithë aeroporti është shkatërruar praktikisht”.
Kievi po shton sulmet e tij
Për muaj të tërë, Ukraina ka zhvilluar një fushatë sulmesh me dronë që synojnë infrastrukturën kryesore ruse, duke përfshirë depot e naftës, rafineritë dhe fabrikat e armëve. Në sulmet e fundit, u goditën dy baza ajrore në Rusi – Borisoglebsk, e vendosur 240 kilometra brenda territorit rus dhe Savasleyka, pothuajse 650 kilometra larg – raporton BBC. Të martën, Kievi kreu një sulm të rëndësishëm edhe në Moskë, por edhe në rajonin Arktik të Murmanskut, ku ndodhen bombarduesit strategjikë rusë. Sipas Ministrisë ruse të Mbrojtjes, të gjithë dronët që depërtuan në hapësirën ajrore ruse u rrëzuan me sukses.
Të enjten në mëngjes, një sulm me dron goditi një traget hekurudhor që transportonte tanke karburanti në portin e Kavkaz, jo shumë larg urës që lidh kontinentin rus me Krimenë. Ukraina ka thënë se do të vazhdojë të sulmojë këtë kalim “të paligjshëm” mbi ngushticën e Kerçit.
Presidenti ukrainas Volodymyr Zelenskiy vizitoi zonën kufitare në rajonin Sumy të enjten, ku forcat ukrainase nisën një ofensivë të papritur thellë në territorin rus në fillim të këtij muaji. Zelenskiy u takua me komandantin suprem, gjenerallejtënant Oleksandr Syrski , për të diskutuar veprimet e mëtejshme ushtarake.
Një nga qëllimet kryesore të kësaj ofensive është ulja e presionit mbi forcat ukrainase në rajonin lindor të Donbasit, ku forcat ruse vazhdojnë të avancojnë. Megjithatë, pavarësisht nga sulmet e Ukrainës, Moska zhvendosi përforcime nga pjesë të tjera të vendit, duke përshpejtuar sulmet në qytetin e Pokrovsk, një bazë kryesore ushtarake ukrainase. Trupat ruse kanë pushtuar tashmë disa fshatra në lindje të Pokrovsko, dhe tani janë vetëm 11 kilometra larg qytetit.
