Nga fillimi i vitit të ardhshëm në Hungari do të nisë programi i ashtuquajtur “Viza e Artë e Hungarisë”, i cili u miratua nga Qeveria e kryeministrit Viktor Orbán. Është një praktikë tjetër që nuk do t’i pëlqejë Brukselit.
Me blerjen e pasurive të paluajtshme në Hungari, investitori do të marrë të drejtën e qëndrimit dhjetëvjeçar në vend, si dhe do të marrë një pasaportë hungareze, e cila do t’i lejojë atij lëvizje të pakufizuar në zonën Shengen. Kusht është blerja e një pasurie të paluajtshme në vlerë të paktën gjysmë milioni euro.
Një tjetër mundësi për të marrë një leje qëndrimi dhjetëvjeçare dhe një pasaportë hungareze është investimi i të paktën 250 mijë eurove në fondet e investimeve në pasuri të paluajtshme të lëshuara nga Banka Kombëtare Hungareze. Opsioni i tretë është një donacion publik prej të paktën një milion eurosh.
Është një praktikë tjetër që mund të zemërojë Bashkimin Evropian.
Gjegjësisht, ligji hungarez nuk thotë se kjo praktikë nuk vlen për qytetarët e Federatës Ruse dhe Bjellorusisë. Në të njëjtën kohë, Rusia ka zhvilluar një luftë agresive kundër Ukrainës fqinje për më shumë se dy vjet, dhe regjimi i presidentit bjellorus Alexander Lukashenko mbështet agresionin rus.
Por rusët dhe bjellorusët me siguri mund të hyjnë në Bashkimin Evropian përmes Hungarisë nga korriku i këtij viti. Ata mund të regjistrohen në vend si punëtorë të huaj me kartë identiteti kombëtar dhe më pas të gëzojnë lëvizjen e lirë brenda Shengenit.
Hungaria ka vendosur që nga 8 korriku 2024, qytetarët e tetë vendeve – Bosnjë dhe Hercegovina, Maqedonia e Veriut, Bjellorusia, Moldavia, Mali i Zi, Federata Ruse, Serbia dhe Ukraina – do të mund të punojnë në territorin e saj në kushte të favorshme.
Aplikimi për lëshimin e kartës së identitetit kombëtar mund të bëhet për dy vjet, por më pas mund të aplikohet sërish për zgjatjen e vlefshmërisë çdo herë për tre vjet të tjerë pa kufizime të mëtejshme.
Ndërsa punëtorët mysafirë ukrainas dhe serbë kanë përdorur më parë Kartën Kombëtare, që nga 8 korriku, karta u zgjerua për aplikantët nga tetë vende, përfshirë Rusinë dhe Bjellorusinë.
Rreziku i sigurisë
András Rac, një ekspert hungarez për Federatën Ruse, tha se me këtë hap, Hungaria po hap shumë tregun e punës për rusët dhe bjellorusët. Rac e sheh këtë si një rrezik të madh sigurie.
Manfred Weber, presidenti i Partisë Popullore Evropiane, paralajmëroi gjithashtu për rreziqe serioze që lidhen me këtë zgjatje të programit.
Shtetet baltike kanë shprehur shqetësimin dhe Komisioneri Evropian për Punët e Brendshme i ka kërkuar ministrit të Brendshëm hungarez Sándor Pinter të shpjegojë se si qeveria hungareze do të parandalojë hyrjen e spiunëve rusë në vend.
Ministri i Punëve të Jashtme Peter Szijártó deklaroi se përfshirja e shtetasve rusë dhe bjellorusë në programin e kartave kombëtare hungareze nuk paraqet rrezik sigurie për zonën Shengen. Ai theksoi se hyrja dhe qëndrimi ende kërkojnë kontrolle të hollësishme.
Szijroto kritikoi politikanët e Evropës Veriore dhe Baltike për atë që ai tha se ishte një fushatë dezinformimi në lidhje me programin e Kartës Kombëtare, për të cilin ata pretendojnë se është i pasigurt. Qytetarët jashtë BE-së mund të punojnë në Hungari me leje të ndryshme, të cilat zakonisht kërkojnë ose leje qëndrimi ose kartë kombëtare, raportojnë mediat hungareze.
Kinezët janë më të interesuarit
Siç thekson portali Index.hu, interesimin më të madh për këtë program deri më tani e kanë shfaqur qytetarët e Kinës.
– Kinezët janë ende të interesuar për pronat e paluajtshme në kryeqytet, vuri në dukje Oran Ben-Ezra, një ekspert në shitjet e pasurive të paluajtshme në Budapest.
Disa prona të reja në Budapest janë shumë të shtrenjta edhe për blerësit e huaj, kështu që ata po kërkojnë opsione më të lira në periferi të qytetit, shtoi ai.
Hungaria do të përfitojë gjithashtu nga programi Viza e Artë. Shteti dhe Banka Kombëtare e Hungarisë do të përfitojnë në afat të shkurtër nga ardhja e investitorëve të huaj dhe kjo do të stimulojë tregun e pasurive të paluajtshme, tha Ben-Ezra.
