Arben Gashi, shef i grupit parlamentar të LDK-së, së bashku me deputetët Avdullah Hoti dhe Hykmete Bajrami, zhvilluan një takim me përfaqësuesit e Sindikatës së Bashkuar të Arsimit, Shkencës dhe Kulturës (SBAShK) për të diskutuar çështje të rëndësishme që prekin sektorin e arsimit në vend.
“Sot, diskutuam mbi kontratën kolektive që duhet nënshkruar sa më shpejt ndërmjet qeverisë dhe sindikatave, si dhe për ligjin për pensionet, duke theksuar diskriminimin e punëtorëve të Republikës së Kosovës gjatë viteve ’90, veçanërisht mësimdhënësve,” tha Gashi.
Përkundër sfidave, Gashi konfirmoi se “viti shkollor do të fillojë siç ishte parashikuar më 2 Shtator.” Megjithatë, ai vuri në dukje se menaxhimi i sistemit arsimor nga qeveria mbetet një sfidë e madhe që kërkon vëmendje dhe veprim të shpejtë.
Grupi Parlamentar i LDK-së riafirmoi angazhimin e tij për përmirësimin e cilësisë së arsimit dhe adresimin e problemeve që ndikojnë në sistemin arsimor.
“Ne do të vazhdojmë të punojmë ngushtë me SBAShK-un dhe aktorët e tjerë relevantë për të siguruar që nevojat e mësuesve dhe nxënësve të përmbushen dhe që arsimi në Kosovë të përparojë në mënyrë të qëndrueshme,” përfundoi Gashi. /Kosovatimes/
