Policia norvegjeze tha se trupi i një gruaje amerikane, e cila u mbyt pasi një kopje e anijes Viking u përmbys gjatë një ekspedite në Ishujt Faroe, është nxjerrë nga deti. Departamenti i Punëve të Jashtme të Shteteve të Bashkuara të Amerikës ka konfirmuar se një shtetas amerikan ka vdekur pranë brigjeve të Norvegjisë, shkruan CNN.
“Arkeologia Karla Dana u shpall e zhdukur pasi Qendra Norvegjeze e Koordinimit të Shpëtimit shpëtoi pesë anëtarët e tjerë të ekuipazhit me të cilët po udhëtonte të martën në mbrëmje”, tha një zëdhënës i policisë norvegjeze për CNN. Gjashtë persona morën pjesë në projektin “Udhëtimi Legjendar Viking”, gjatë të cilit ata duhej të lundronin nga Ishujt Faroe në Trondheim të Norvegjisë me anijen Naddoddur, një kopje e një anijeje vikinge.
Ata dërguan thirrje për ndihmë në dy raste
Të martën rreth orës 17:45 me orën lokale, një sinjal rreziku u dërgua nga anija. Ekipi i shpëtimit mbërriti në vendngjarje rreth 50 minuta më vonë, por ata sinjalizuan nga anija se gjithçka ishte në rregull dhe ekipet e shpëtimit u kthyen.
Rreth orës 20:00 nga anija është dërguar një thirrje e re për ndihmë. Varkat civile lokale që mbërritën në vendngjarje raportuan se anija ishte përmbysur dhe se në varkë shpëtimi ndodheshin pesë persona. Duke qenë se mes të mbijetuarve nuk kishte asnjë arkeolog, shërbimet e shpëtimit organizuan një kërkim. Ata e gjetën trupin e saj mëngjesin e së mërkurës. /Index
