Avokati Çedomir Stojkoviq i ka dorëzuar sot në zyrën e Presidencës së Serbisë një kërkesë presidentit Aleksandar Vuçiq që të heqë dorë nga Urdhri “Aleksandar Nevski”, i cili i është dhënë nga presidenti i Rusisë, Vladimir Putin, më 2019. Sipas Stojkoviqit, një shtet presidenti i të cilit mban Urdhrin e Putinit nuk mund të hyjë në Bashkimin Evropian.
Blerja e aeroplanëve luftarakë francezë “Rafal” dhe vizita e Presidentit të Francës, Emmanuel Macron, si dhe thirrjet e tij që Serbia të ecë drejt Bashkimit Evropian, ngrenë pyetjen nëse kjo mund të çojë në një riorientim strategjik të Serbisë dhe largimin nga Rusia?
Për një grup qytetarësh të udhëhequr nga avokati Çedomir Stojkoviq një ripërqendrim i tillë nuk është i mundur deri sa Presidenti i Serbisë, Aleksandar Vuçiq, mban urdhrin e dhënë nga Vladimir Putin.
Stojkoviq i dorëzoi Presidentit Vuçiq një kërkesë për të hequr dorë nga ky urdhër, pikërisht në kohën kur Presidenti i Francës, Emmanuel Macron, po qëndron në Serbi.
“Ne e ftojmë Vuçiqin të heqë dorë nga urdhri i marrë nga Putini, i cili është armik i Evropës me një agjendë politike për të shkatërruar BE-në ose për të futur përçarje në të. Një shtet, presidenti i të cilit mban një urdhër të tillë, nuk mund të hyjë në BE”, tha Stojkoviq.
Sipas tij, nëse Vuçiq me të vërtetë dëshiron një perspektivë evropiane për Serbinë, atëherë do të heqë dorë nga ky urdhër sot.
“Nëse nuk e bën këtë, është e qartë se deklaratat e tij në konferencën për shtyp janë të rreme dhe se, pavarësisht porosisë së avionëve perëndimorë, nuk ka ndërmend ta largojë Serbinë nga ndikimi rus dhe ta pozicionojë atë në BE,” tha Stojkoviq.
Vetë presidenti i Serbisë deklaroi se edhe pas blerjes së “Rafalëve” francezë, Serbia “nuk do të ndryshojë qëndrimin e saj” ndaj Rusisë. Njohësit e zhvillimeve vlerësojnë se Serbia do të përpiqet të marrë mbështetje të mëtejshme nga Macron për të vazhduar rrugën e saj drejt BE-së edhe më fuqishëm.
Megjithatë, Çedomir Stojkoviq nuk është i bindur për këtë, prandaj i dorëzoi Vučićit edhe një tortë me emrin simbolik “perspektiva evropiane e Serbisë nën Vuçiqin”.
“Kjo tortë është e deformuar, ashtu si rruga jonë evropiane, e kërcënuar nën Vuçiqin”, tha Stojkoviq.