Sipas informacioneve të disponueshme nga mediat turke, një grup sulmuesish kanë mbërritur mëngjesin e sotëm para urgjencës së spitalit dhe kanë hapur zjarr në mënyrë të rastësishme. Mes të plagosurve është një polic, një pjesëtar i xhandarmërisë, një roje private dhe dy civilë. Sulmi i armatosur ka shkaktuar dëme materiale në spital dhe në autoambulancën që ndodhej para godinës.
Në deklaratën e guvernatorit të Stambollit, theksohet se asnjë nga të lënduarit nuk është në rrezik. Të plagosurve, mes të cilëve një polic, një pjesëtar i xhandarmërisë, një roje private dhe dy civilë, iu është dhënë menjëherë kujdesi urgjent mjekësor. Gjendja e tyre shëndetësore është stabilizuar, thuhet në deklaratë.
Policia ka nisur menjëherë hetimet për identifikimin dhe kapjen e autorëve. Automjeti i përdorur në sulm u gjet i braktisur dhe kamerat e sigurisë në zonë po shqyrtohen për të mbledhur prova shtesë. Kërkimet për autorët janë në vijim, ndërsa policia apelon qytetarët që nëse kanë informacione t’ia paraqesin organeve kompetente.
