Ministri i Financave, Hekuran Murati, ka publikuar sot një tabelë, ku sipas tij, paraqitet ngritja e shumës së pagave që paguhen në Kosovë brenda një viti përfshirë sektorin publik dhe privat.
Murati, përmes një postimi në Facebook, ka thënë se për 4 vite, gjatë qeverisë Kurti, shuma e pagave të paguara në ekonominë e Kosovës është shtuar për 1 miliardë euro.
“Nëse e krahasojmë me qeveritë e kaluara, për t’u shtuar 1 miliardë euro nevojiteshin 10 vite, dhe 4 qeveri së bashku”, ka thënë Murati.
Rritja më e madhe, sipas tij, brenda një viti ka ndodhur në vitin 2023, ku janë shtuar 450 milionë euro më shumë paga sesa viti 2022.
“Nga kjo shumë, rreth 114 milionë euro (17% rritje) janë shtuar nga rritja e pagave në sektorin publik si rezultat i hyrjes në fuqi të ligjit të pagave, kurse pjesa tjetër e rritje vjen nga sektori privat, kryesisht nga shtimi i vendeve të punës por edhe rritja e pagave për ato ekzistuese”, ka shkruar Murati në Facebook. /Kosovatimes/
