Sindikata e Bashkuar e Arsimit, e Shkencës dhe e Kulturës uron mësimdhënësit, nxënësit dhe prindërit për vitin e ri shkollor për të vazhduar betejat për dije dhe arritje të reja.
Përmes një komunikate për medie, SBAShK-u vë në pah se edhe në këtë vit shkollor do të përballet me shumë sfida, por shfaq shpresën se bashkërisht mund të tejkalohen më lehtë.
“Të nderuara anëtare, të nderuar anëtarë të SBAShK-ut, ne jemi në vazhdimësi të angazhimeve që me dialog të gjejmë zgjidhje meritore për kërkesat tuaja legjitime edhe pse nuk e kemi të lehtë sepse Qeveria vazhdon me qasjen e gabuar ndaj dialogut dhe ndaj sindikatave në tërësi”, thuhet në komunikatë.
Tutje SBAShK njofton se do të vazhdojë me aktivitetet dhe me komunikimin me institucionet dhe palët tjera me qëllim që të realizojmë gjithë kërkesat e anëtarësisë.
Megjithatë, kjo sindikatë sqaron se nëse dialogu nuk jep asnjë rezultat, atëherë do të respektojë vullnetin e anëtarësisë edhe për veprime sindikale, për të cilat vendosin përfaqësuesit e tyre që nga çerdhet e deri në universitete në Këshillin Drejtues të SBAShK-ut. /Kosovatimes/
