Zëvendësministri i Mbrojtjes, Shemsi Syla, priti sot në takim udhëheqësen e Komitetit Amerikane-Hebraik, Avital Leibovich.
Sipas njoftimit nga ministria e Mbrojtjes, në takim u diskutua lidhur me situatën e përgjithshme në vend dhe mjedisin e sigurisë globale, duke shprehur vullnetin e përbashkët për angazhim të të gjithëve për sigurinë dhe stabilitetin e qëndrueshëm në rajon dhe më gjerë.
“Ndër tjera u përmend edhe bashkëpunimi i mirë në mes të të dy vendeve, duke përfshirë edhe bashkëpunimin strategjik në mbrojtje dhe zëvendësministri Syla theksoi se ky bashkëpunim, i cili i ka themelet nga historia e përbashkët e miqësisë nga e kaluara, është një dëshmi e përkushtimit të të dy vendeve për paqe dhe siguri, duke ndarë vlera të përbashkëta demokratike dhe qëndrueshmëri në sfidat globale”, thuhet në njoftim.
Të dy bashkëbiseduesit u pajtuan që është shumë e rëndësishme të shtohet komunikimi dhe vizitat e ndërsjella të përfaqësuesve institucionalë.
Sipas njoftimit, Leibovich e ka falënderuar Kosovën për mbështetjen që i ka dhënë Izraelit.
“Në fund të këtij takimi Leibovich falënderoi zëvendësministrin Syla dhe popullin e Kosovës për mbështetjen ndaj popullit izraelit në përballimin e sfidave me të cilat po përballet me ç ‘rast zëvendësministri Syla e falënderoi për angazhimin e saj të shumtë për popullin tonë gjatë detyrave të ndryshme që ajo ka mbajtur deri tash, gjithashtu uroi që sa më shpejt të kalohet kjo luftë dhe të dominojë paqja në atë rajon”, thuhet tutje në njoftim. /Kosovatimes/
