Presidenti turk Tajip Erdogan i ka bërë thirrje Organizatës së Bashkëpunimit Islamik që të thërrasë një samit të jashtëzakonshëm për të diskutuar luftën në Gaza dhe “sulmet izraelite në Jerusalem”, raporton sot Reuters.
Erdogan, një kritik i hapur i Izraelit gjatë luftës së vendit kundër grupit militant Hamas në Gaza, u bëri thirrje vendeve islamike gjatë fundjavës që të krijojnë një aleancë kundër “ekspansionizmit” izraelit.
Duke folur pas një takimi të kabinetit në Ankara, Erdogan tha se Izraeli synoi Xhaminë Al-Aksa në Jerusalem si pjesë e fushatës së tij “ekspansioniste”. Jeruzalemi dhe ajo xhami, e njohur për hebrenjtë si Mali i Tempullit, ishin “vija e kuqe” e Ankarasë, shtoi ai.
Organizata e Bashkëpunimit Islamik (OIC) ka 57 shtete anëtare dhe prezantohet si zëri kolektiv i botës myslimane.
“Është e paimagjinueshme që OIC, detyra e së cilës është të kujdeset për çështjen e Jeruzalemit, të mbetet indiferente ndaj këtyre sulmeve. Organizata duhet të mblidhet urgjentisht në nivel drejtues, pa humbur kohë,” tha Erdogan.
Ai shtoi se Turqia do t’i drejtohet Gjykatës Ndërkombëtare të Drejtësisë në Hagë lidhur me vrasjen nga Izraeli të një gruaje turko-amerikane, Aysenur Ezgi Eygi, në një protestë në Bregun Perëndimor javën e kaluar.
“Ne do të ndërmarrim të gjitha hapat ligjorë,” premtoi Erdogan.
“Udhëheqja izraelite që kreu gjenocidin do të jetë absolutisht përgjegjëse për krimet që kanë kryer”, shtoi ai.
