Aktivistja suedeze e klimës Greta Thunberg u bë objekt i ndërhyrjes së policisë për herë të dytë në vetëm një javë.
Këtë herë gjithçka ka ndodhur gjatë protestës së djeshme pro-palestineze në Stokholm. Thunberg ishte pjesë e një grupi protestuesish që ngritën tenda brenda bibliotekës së Universitetit të Stokholmit, duke kërkuar që universiteti të ndërpresë lidhjet e tij me universitetet izraelite.
“Studentët ngritën tenda në bibliotekë për të thënë se janë ngopur me pjesëmarrjen në gjenocidin në Gaza”, shkroi Thunberg në një postim në Instagram. Ajo ka shpërndarë edhe një video ku shihet se policët e largojnë atë dhe protestuesit e tjerë, raporton Politico .
U arrestua në Kopenhagë javën e kaluar
Thunberg dënoi veprimet e policisë. “Ne nuk do të pranojmë shtypjen e policisë suedeze ndaj studentëve që po protestojnë paqësisht kundër gjenocidit”, theksoi ajo. Thunberg, një aktiviste më e njohur për fushatën e saj për ndryshimet klimatike, u arrestua në Kopenhagë javën e kaluar gjatë protestave pro-palestineze.
Sipas mediave suedeze, policia në Stokholm ka marrë një denoncim për protestuesit në orën 12:52 të ditës së djeshme. Stafi mendoi se protestuesit po prishnin punën e bibliotekës dhe kërkuan që ata të protestonin jashtë. Në orën 14:15 policia ka nisur ndjekjen e protestuesve të cilët nuk janë larguar vullnetarisht.
Sipas zëdhënësit të policisë Mats Eriksson, dëbimi i protestuesve ishte paqësor. “Nëntë persona dyshohen se nuk i janë bindur policisë. Një person është arrestuar pasi nuk ka pranuar të japë identitetin e tij,” tha ai.
Thunberg ka kritikuar prej kohësh veprimet e Izraelit. Tetorin e kaluar, ushtria izraelite e akuzoi atë për mbështetjen e njerëzve që organizuan pushtimin e Izraelit në të cilin vdiqën rreth 1200 njerëz.
