Ajri polar i ftohtë dhe i lagësht është përhapur në një pjesë të madhe të Evropës dhe temperaturat kanë rënë nën 10 gradë në shumë vende. Në Alpet austriake, ku prej ditës së djeshme bie vazhdimisht borë, lartësia e mbulesës së dëborës në disa vende i ka kaluar 80 centimetra.
Në rrjetet sociale janë shfaqur pamje të pabesueshme nga Alpet Lindore, konkretisht nga Obertaurn, ku bora ka groposur pothuajse tërësisht shtëpitë dhe arrin deri në bel. Makinat janë mbuluar tërësisht nga bora.
Që prej ditës së djeshme bora ka filluar të bjerë në lartësitë 1500 metra mbi nivelin e detit, por kufiri i reshjeve të borës ka zbritur gradualisht në 1100 metra. Në orët e mbrëmjes, bora filloi të bjerë tashmë në 900 metra dhe lokalisht në 700 metra mbi nivelin e detit, duke mbuluar qytetet alpine dhe duke mos ndalur së rëni.
