Një nga kandidatët për kryetar bashkie të São Paulo të Brazilit ka sulmuar një tjetër me karrige.
José Luiz Datena dhe Pablo Marçalo po debatonin dhe më pas Datena i hodhi një karrige kundërshtarit të tij. Gjithçka u transmetua drejtpërdrejt nga TV Cultura. Më vonë Datena tha për TV Cultura se ai sulmoi Marçalin sepse ai ngriti akuza të vjetra për ngacmime seksuale kundër tij, të cilat ishin hedhur poshtë disa vite më parë.
“Ka ardhur me një rast të arkivuar, të cilin as policia nuk e ka hetuar se nuk ka prova. Diçka e 11 viteve më parë që ka shkaktuar një situatë shumë të rëndë në familjen time”, tha Datena. Edhe pse u përjashtua nga debati, ai insistoi në deklaratën e tij të djeshme se nuk është penduar për veprimet e tij, shkruan CNN .
Marçal u shtrua në Spitalin Sírio Libanês. Ekipi i tij tha se ai u shtrua në spital me një frakturë të mundshme në zonën e gjoksit dhe kishte vështirësi në frymëmarrje. Nga spitali thuhet se ai ka pësuar lëndime në gjoks dhe kyçin e dorës, por nuk ka pasur komplikime të mëdha.
Kandidatët e mbetur Guilherme Boulos, Marina Helena, Ricardo Nunes dhe Tabata Amaral vazhduan debatin pas sulmit. TV Cultura tha se i vjen keq për incidentin dhe vazhdoi debatin në përputhje me rregullat pasi kandidatët e tjerë ranë dakord.
