Delegacioni nga Komisioni i Punës dhe Çështjeve Sociale nga Parlamenti Gjerman, që ka nisur një vizitë në rajonin e Ballkanit Perëndimor, po mban takimin e parë në Prishtinë me Komisionin për Shëndetësi dhe Mirëqenie Sociale dhe Komisionin për Buxhet, Punë dhe Transfere.
Takimi synon të gjejë mënyra bashkëpunimi ndërmjet të dyja vendeve, të cilat kanë bashkëpunim të ngushtë në fushën e shëndetësisë. Ikja dhe largimi i infermierëve dhe mjekëve në shtetet e BE-së, sidomos në Gjermani, ishte çështje diskutimi mes dy delegacioneve. Anelika Glückner, deputete gjermane, tha se kjo vizitë në rajon do të ndikojë që të njohin sa më shumë nevojat për përmirësim të jetës sociale-shëndetësore të vendeve përkatëse.
“Për ne është më interes që të lidhim sa më shumë marrëveshje, duke pasur parasysh situatat në të dyja vendet. Kemi marrëveshje me Indinë dhe vende të tjera nga Azia,” tha Glückner.
Deputetja e LVV-së, Fatmire Kollçaku, që është edhe kryetare e Komisionit Parlamentar për Shëndetësi në Kuvendin e Kosovës, vlerësoi mundësinë e bashkëpunimit në funksionalizimin e ndërmarrjeve sociale.
“Qeveria po subvencionon qytetarët në pajisje efiçiente dhe po bëjmë ndryshime të mëdha në pjesën e legjislativit për të përmirësuar jetën sociale në Kosovë. Kosova dhe Gjermania kanë një bashkëpunim të madh në fushën e shëndetësisë, dëshira jonë mbetet që mjekët tanë të përfitojnë nga avancimet në mjekësi në shtetin tuaj dhe këto përvoja t’i sjellin në vendin e tyre. Pra qëllimi ynë është që ata të kthehen në Kosovë dhe të kontribuojnë në vendin tonë. Sigurisht për ne është më rëndësi të dimë për mirëqenien e gjithë kosovarëve në Gjermani, jo vetëm për ata që janë atje me kontrata pune, por edhe kosovarët që kanë shtetësi gjermane”, tha Kollçaku.
Deputeti Armend Zemaj tha se është e nevojshme që të gjendet një mundësi për kontroll shtetëror për pjesën deficitare të profesionistëve shëndetësor të Kosovës, që të ketë marrëveshje ndërmjet të dyja vendeve, në subspecializime dhe përvoja tjera, që ndihmojnë shëndetësinë në Kosovë dhe jo vetëm që të na ikin profesionistët.
“Aktualisht Kosova po përballet me ikje të mjekëve dhe infermierëve të gatshëm profesionalisht, në shtetin gjerman,” tha Zemaj.
Deputeti gjerman, Carl-Julius Cronenberg, theksoi rëndësinë e sigurimit shëndetësor në Kosovë, që sipas tij do të krijonte një standart të ri në fushën e shëndetësisë në Kosovë.
“Kosova pas disa viteve do të mund t’i bashkohet BE-së dhe kjo na gëzon neve, me gjithë vështirësitë që po kalon tash në fazën e dialogut me shtetin fqinj. Aspektet e shëndetësisë, nuk është pse Gjermania është atraktive për profesionistët shëndetësor, por që Kosova ka nevojë për një sistem solid shëndetësor, duke nisur nga sigurimet shëndetësore, dhe çka mund të bëhet është një bashkëpunim më i madh ndërmjet klinikave të të dyja vendeve. Gjermania ka interes ta shoh Kosovën në BE, për të pasur më lehtë bashkëpunimin ndërmjet të dyja vendeve”, tha Cronenberg.
Deputeti Pal Lekaj, vlerësoi se sistemi social dhe shëndetësor në Kosovë është larg synimeve dhe nivelit që kanë arritur vendet e BE-së dhe ato që kanë synim të bëhen pjesë e BE-së.
“Ne si shtet i ri kemi një shtet të fuqishëm para vetës, siç është Gjermania dhe kërkojmë nga ju që të ndikoni edhe tek investitorët që të vijnë dhe të investojnë në Kosovë sepse kjo ul varfërinë dhe papunësinë”, tha Lekaj.
Deputetja, Jeta Statovci, përmendi para deputetëve gjerman reformat sociale që ka bërë vendi dhe ndihmat direkte për qytetarët. “Shtesa direkte jepen për fëmijët dhe lehonat qofshin ato të punësuara a po të papuna. Aspekt që ka qenë me rëndësi është përgjigja që qeveria i ka dhënë krizës energjetike, ku qytetarët janë subvencionuar, janë ndihmuar 30 mijë familje me pajisje efikase. Borxhi publik ka rënë, aktualisht Kosova borxhin publik e ka më të ulët në rajon”, tha Statovci.
Deputeti, Bekim Haxhiu, përmendi sfidat që kanë qytetarët në trajtim shëndetësor, në mungesë të sigurimeve shëndetësore. “Mbështetja e Bundestagut gjerman për këto 25 vite ka qenë tepër e madhe, dhe në vazhdimësi projektet dhe problemet tona janë për shkak të mungesave të fondeve, kur nuk ka fonde publike, qytetarët detyrohen t’i paguajnë vet shpenzimet, ata që nuk kanë mundësi të paguajnë një operacion, presin deri në 4 vjet për një operim, ata që kanë shkojnë në klinika private, prandaj na duhet ligji për sigurime shëndetësore, që të gjithë të trajtohen njëjtë”, tha Haxhiu.
