Organizata joqeveritare Iniciativa per Progres (INPO) nëpërmjet një reagimi ka shprehur kritikat lidhur me mundësinë e ndikimit të vendimit qeveritar për rritjen e pagës minimale në kontekstin e zbatimit të kontratave të prokurimit publik.
Në komunikatën e tyre bëhet e ditur se ata përkrahin çdo politikë që ndikon në përmirësimin e jetës së qytetarëve, por shtrojnë çështjen e ndikimit në veprimtarinë e operatorëve ekonomik të cilët kanë të lidhura kontrata për shërbime me autoritetet kontraktuese.
“Në këtë kuadër, ndryshimi i pagës minimale ka gjasa të prodhoj efekte të rëndësishme për subjektet ekonomike të cilët kanë paraqitur oferta në tenderë, duke u bazuar në pagën minimale të mëparshme në përllogaritjet e tyre financiare. Në kontekstin e tanishëm, ndryshimi i papritur i pagës minimale mund të sjellë një diferencë të konsiderueshme të kostos operative dhe të rrisë barrën financiare në ekzekutimin e kontratave, duke e bërë më të vështirë përmbushjen e detyrimeve kontraktuale”, thuhet në komunikatë.
Sipas INPO-s tashmë kjo do të ketë për pasojë kosto shtesë për operatorët ekonomik të cilët kanë kontrata aktive.
“Nga këndvështrimi i operatorëve ekonomik me të cilët INPO ka zhvilluar diskutime, ky ndryshim i pagës minimale do të reflektoj ndjeshëm në zbatimin e kontratave aktive dhe mund të ndikojë negativisht në operacionet e biznesit. Për më tepër, operatorët ekonomik theksojnë për mungesë të dispozitave të qarta në legjislacionin aktual të prokurimit publik për situata të tilla, për çfarë një pjesë e tyre kanë paraqitur kërkesat në autoritete kontraktuese për ndryshim të kontratave. Deri tani, nuk ka një qëndrim juridik të Qeverisë rreth këtij ndikimi e as udhëzime për efektet e mundshme të ndryshimeve pas nënshkrimit të kontratave”, vazhdon komunikata.
Për këtë, INPO apelon që autoritetet përgjegjëse të shqyrtojnë këto pasoja të mundshme dhe të ndërmarrin masa për adresimin e ndikimeve negative në qëndrueshmërinë e kontratave.
