Ministri i Kulturës, Hajrulla Çeku, i ka dorëzuar sot raportin e dokumentimit mbi krimet e luftës në Kosovë, Institutit për Dokumentimin e Krimeve të Luftës.
Ai ka thënë se raporti është rezultat i punës së Komisionit shtetëror të emëruar nga Qeveria, me anëtarë nga institucionet shtetërore dhe profesionale.
“Gjatë luftës, krahas krimeve të shumta të luftës, projekti gjenocidal serb kishte shënjestruar edhe trashëgiminë kulturore të Kosovës. Kulturocidi serb në Kosovë ishte me pasoja tronditëse”, ka shkruar Çeku.
Sipas këtij raporti të shkatërruara janë 1784 monumente, 3724 artifakte të grabitura, 175 biblioteka të shkatërruara, 1.7 milion libra shqip të asgjësuar, dhjetëra mijëra dokumente arkivore të monumenteve të grabitura, si dhe qindra vepra arti të dëmtuara e vjedhura.
Ministri Çeku ka theksuar se nuk do të ndalen për asnjë moment në betejën për drejtësi e dëmshpërblim karshi Serbisë. /Kosovatimes/
