Ish-komandanti I Ushtrisë Çlirimtare të Kosovës, Pjetër Shala, në konferencën e parë të Apelit shprehu kritika për aktgjykimin e tij në Dhomat e Specializuara të Hagës.
Shala që e përcolli konferencën përmes video-lidhjes tha se me ekipin mbrojtës kanë vërejtur qindra fjalë të ndryshuara në fjalën përfundimtare ndaj tij.
“Unë kam një shqetësim shumë të madh sa i përket për tri ditë seancë të mëparshme 15,16, 17 kur ishte leximi përfundimtar. Vetëm për tri ditë gjetëm mbi 213 fjalë të ndryshuara, jo gabimisht të përkthyera, por të ndryshuara. Dhe unë nuk e kam akoma në gjuhën shqipe rrjedhën si ka rrjedhë gjykimi im prej fillimi deri në ato tri ditët e fundit, nuk e kam pas vëmendjen se nuk ma ka marrë mendja se bëhen gabime të tilla, që të ndryshohet fjala”, tha Shala.
Shala theksoi se ende nuk e ka marrë të përkthyer në gjuhën shqipe aktvendimin dënues ndaj tij.
“Nuk e kam as aktvendimin të përkthyer. Unë nuk e di si do të ankohemi, bëjmë ankesën kur unë nuk e di se në çfarë mënyrë dënohem. Më jepet aktvendimi, dënohem për vrasje që s’kam vra kurrë në jetën time askënd. Ma shpjegojnë avokatet e unë nuk muj me besu përderisa nuk e kam zyrtarisht në mënyrë zyrtare, përpara vetës ta lexoje, ta kuptoj se për çka jam i dënuar”, theksoi ai.
Atij iu përgjigj kryetarja e panelit të Apelit, Michele Picard, e cila tha se një gjë e tillë pret të bëhet sa më shpejt që është e mundur.
Ndërkohë që avokati i Shalës, foli për shëndetin e klientit të tij.
“Pikë se pari dua të flas për gjendjen fizike dhe mendore të Shalës. Nuk ka ndonjë gjë në veçanti për të thënë në lidhje me këtë përveç se ju e dini të gjithë situatën familjare të z.Shala dhe problematikat që ka ai. Kjo ka pasur ndikim në gjendjen e tij shpirtërore”, tha Jean Louis Gilissen, avokat i Pjetër Shalës.
Kurse, avokati tjetër i Pjetër Shalës, Mohamed Hedi Aouini tha se nuk janë dakord me aktgjykimin e shpallur ndaj klientit të tij si dhe do të apelojnë edhe urdhrin për zhdëmtim.
Më 16 korrik të këtij viti, Pjetër Shala, u shpall fajtor për krime lufte dhe u dënua me 18 vjet burgim.
