Presidentja e Kosovës, Vjosa Osmani, po qëndron për vizitë zyrtare në ShBA. Ajo ka publikuar fotografi nga pritja që i është bërë nga ushtria amerikane në akademinë ushtarake West Point.
Osmani ka thënë se është jashtëzakonisht e nderuar me pritjen madhështore që i është bërë.
“Jashtëzakonisht e nderuar me pritjen madhështore nga ushtria amerikane në akademinë ushtarake West Point! ”, ka shkruar Osmani.
Presidentja Osmani ka udhëtuar të enjten për në New York, ku në kuadër të Javës së Nivelit të Lartë të sesionit të 79-të të Asamblesë së Kombeve të Bashkuara do të zhvillojë takime me liderë botërorë, organizata ndërkombëtare, si dhe aktivitete tjera zyrtare. /Kosovatimes/
Presidentja Vjosa Osmani ka shpërndarë një video nga pritja që i është bërë nga kadetët e ushtrisë amerikane në akademinë West Point.
“Jam këtu për t’ju falënderuar nga thellësia e zemrës për udhëheqjen tuaj, për udhëheqjen tuaj të guximshme dhe për përkushtimin tuaj ndaj paqes dhe sigurisë, jo vetëm këtu, por edhe jashtë vendit. Falë përkushtimit të trupave amerikane dhe mbështetjes së SHBA-së, populli i Kosovës është më në fund i lirë, i pavarur dhe duke jetuar në demokraci”, ka theksuar ndër të tjera presidentja Osmani para kadetëve amerikanë, të cilët e kanë përcjellur atë me duartrokitje dhe brohoritje ‘Kosova, Kosova’.
E për këtë pritje, presidentja Osmani ka shkruar edhe në platformën ‘X’, teksa e ka publikuar videon.
“Kjo është ajo që e përfaqëson aleanca Kosovë-SHBA! Një mirëseardhje e jashtëzakonshme nga kadetët dhe personeli ushtarak në West Point. Lidhja jonë është e fortë dhe së bashku qëndrojmë të bashkuar”, ka shkruar Osmani.
