Trajneri i Bayern Munich, Vincent Kompany, ka thënë se nuk do të jetë e lehtë ndeshja e së shtunës ndaj Bayer Leverkusen në Bundesligë, pavarësisht formës së skuadrës së tij.
Bayern ka fituar të katër ndeshjet e këtij sezoni dhe kryeson tabelën me dymbëdhjetë pikë, tri më shumë se Leverkusen, që renditet në vendin e dytë.
“Natyrisht që do të jetë një ndeshje e rëndësishme, ndaj ekipit më të mirë të dymbëdhjetë muajve të fundit. Po e presim me padurim këtë sfidë. Nuk do të jetë e lehtë”, është shprehur Kompany gjatë konferencës për shtyp.
Trajneri belg ka theksuar se Bayern, si gjithmonë, është favorit, por ndeshja ndaj kampionëve aktualë të Bundesligës do të kërkojë përgatitje të veçantë.
“Ne duam ta testojmë veten ndaj një kundërshtari të mirë në ‘Allianz Arena’. Bayern është gjithmonë favorit. Mezi presim të luajmë kundër kampionëve dhe duam të fitojmë… Gjithçka është e mundur në një ndeshje si kjo ndaj Leverkusen. Do ta përgatisim ekipin për të dhënë maksimumin të shtunën”, ka thënë Kompany.
Pas përballjes me Leverkusen, Bayern do të udhëtojë për t’u ndeshur me Aston Villa në Champions League.
