Një zjarr i madh shpërtheu në fabrikën e prodhimit Tata Electronics, ku prodhohen iPhone, mëngjesin e sotëm në qytetin Krishnagiri, në shtetin indian të Tamil Nadu.
Zjarri ka nisur në repartin e lyerjes së aksesorëve të celularëve rreth orës 5:30 me orën lokale, duke detyruar punonjësit të largohen menjëherë nga zona.
Në vendngjarje kanë mbërritur shtatë zjarrfikëse për të shuar zjarrin dhe për të evakuuar të gjithë punonjësit nga objekti.
Agjencia IANS raportoi për dëme të konsiderueshme materiale dhe njësitet zjarrfikëse janë ende duke punuar për shuarjen e zjarrit.
Mediat lokale raportojnë se dyshohet se zjarri ka rënë në departamentin e lyerjes së aksesorëve për celularë.
Tymi i dendur mbuloi me shpejtësi zonën, duke shkaktuar panik te punëtorët dhe banorët vendas. Sipas mediave lokale, deri më tani nuk raportohet për të lënduar.
Një nga prodhuesit kryesorë të iPhone
Tata Electronics është një nga prodhuesit kryesorë të iPhone në Indi, së bashku me Foxconn. Kompania tha se po heton shkakun e zjarrit dhe do të marrë hapat e nevojshëm për të mbrojtur punonjësit dhe palët e tjera të interesuara.
“Ka pasur një incident fatkeq,” tha një zëdhënës i Tata Electronics në një deklaratë. “Protokollet tona të urgjencës në fabrikë kanë siguruar që të gjithë punonjësit të jenë të sigurt,” shtoi ai.
