Ministrja e Punëve të Jashtme dhe e Diasporës, Donika Gërvalla, mori pjesë në Takimin Ministror për Situatën Urgjente në Venezuelë, në kuadër të sesionit të 79-të të Asamblesë së Përgjithshme të OKB-së. Nga atje Gërvalla ka thënë se Venezuela po tenton shtrirjen në Ballkan përmes satelitëve të Rusisë.
Ajo mori pjesë në këtë takim, me ftesë të Sekretarit Amerikan të Shtetit, Antony Blinken dhe Ministres së Punëve të Jashtme të Republikës së Argjentinës, Diana Mondino.
“Në fjalën e saj, Ministrja Gërvalla shprehu qëndrimin e Kosovës në mbështetje të përpjekjeve për të ndaluar liderët jo-demokratikë në përpjekjet e tyre për të mohuar të drejtat e qytetarëve të tyre dhe për të destabilizuar rajonet e ndryshme të botës. Më tej Ministrja Gërvalla vuri në pah edhe angazhimin e Venezuelës në Ballkan përmes miqve dhe satelitëve të Rusisë në rajonin tonë, me partneritete dhe lidhje të reja ekonomike, të cilat kërkojnë një vëmendje të shtuar dhe kujdes të veçantë”, thuhet në komunikatën e MPJD-së. /Kosovatimes/
