Kuvendi Komunal i Prishtinës mbajti mbledhje të jashtëzakonshme, ku në rend të ditës ishte “Propozim-vendimi për miratimin e buxhetit të Komunës së Prishtinës për vitin 2025”.
Për të dytën herë me radhë ky buxhet nuk gjeti përkrahjen e shumicës. Kjo pasi asamblistët e VV-së lëshuan mbledhjen ku po diskutohej buxheti i Prishtinës për vitin 2025 për çfarë nuk kishte kuorum për votimin.
Paraprakisht kryetari i Komunës së Prishtinës, Përparim Rama tha se buxheti është i gjatë dhe transparent që mundëson zhvillimin e kryeqytetit.
“Të gjitha procedurat i i kemi diskutuar dhe përpilimi i buxhetit është një proces shume transparent dhe gjitha kërkesat e qytetarëve shkojnë nëpër drejtori përkatëse. Ky buxhet mundëson transformimin dhe zhvillimin e kryeqytetit”, tha ai.
Valbona Makolli, drejtoreshë e Financave në Komunën e Prishtinës, tha se buxheti për kryeqytetin do të jetë mbi 128 milionë euro.
“Kryeqyteti për vitin 2025 do të këtë mbi 128 milionë euro ku do të ndahet në kategori sikurse paga dhe mëditje, mallra dhe shërbime, subvencione e kategori të tjera”, tha ajo.
Shefi i asamblistëve të Lëvizjes Vetëvendosje në Kuvendin Komunal të Prishtinës, Gëzim Sveçla tha se ky buxhet nuk i shërben kryeqytetit.
“Siç e dini ky është një moment vendimtar që determinon vizion për zhvillim. Është moment kritik dhe se VV nuk mund të mungoj siç nuk ka munguar as një herë në raste të tilla. Kemi përkrahur dhe kemi mbështetur çdo iniciativë që është në të mirë të kryeqytetit. Për këtë buxhet as nuk jemi pyetur as nuk jemi konsultuar. Vazhdojmë të mendojmë që ky buxhet nuk i shërben Prishtinës është buxhet zgjedhor i LDK-së i krijuar nga zyrtarë të LDK për interesat e tyre partiake për ta shtyrë përpara agjendën zgjedhore”, ka thënë ai.
Edhe Nora Kelmendi nga VV tha se me këtë buxhet nuk shohin zhvillimin e kryeqytetit.
“Kjo është hera e dytë që ky buxhet po diskutohet. Ky dokument do të duhej të përcaktonte të ardhmen dhe ne kemi për detyrë të analizojmë këtë dokument. Por ne nuk po e shohim vizionin për zhvillimin e kryeqytetit e që do duhej të ishte në përputhje me nevojat e qytetarëve. Ky buxhet është punuar sa për sy e faqe”, tha ajo.
Shefja e grupit të asamblistëve të LDK-së në Prishtinë, Jeta Rafuna ka ftuar partitë opozitare që ta votojnë buxhetin.
“Po i bëj thirrje partive opozitare që të mos bllokojnë këtë projekt. Bllokimi rrezikon mirëqenien e qytetarëve. Është buxhet për arsim, për shëndetësi e zhvillim ekonomik”, tha ajo.
Kurse Bahri Gashi nga AAK tha se edhe pse ka mangësi por si Aleancë do ta votojnë buxhetin. Edhe Gëzim Mehmeti nga AKR në Prishtinë, ka thënë se përkrahin miratimin e buxhetit.
“Pozita ka pasur dështime, gabime por edhe projekte që kanë mbetur në letër. Por sot nuk është dita për t’i llogaritur dështime, kemi një vendim të rëndësishëm se çfarë do të bëhet për kryeqytetin. Mos miratimi i buxhetit do të thotë ndalimi i projekteve jetike në shumë fusha dhe ndalimi i hapësirave të gjelbra për qytetarët. Pavarësisht që kemi shume arsye, ne nuk lejojmë që të mbahen peng projektet për kryeqytetin. Sot jemi të gatshëm dhe do ta votojë buxhetin sepse e mbështes qytetin tim”, ka thënë Mehmeti.
Endrit Zabërgja nga Nisma tha se vota e tyre do të jetë pro dhe u ka bërë thirrje opozitës që të jemi të ndërgjegjshëm.
