Forcat speciale izraelite po kryejnë operacione hetimore brenda Libanit përpara një sulmi të mundshëm tokësor, tha një zyrtar izraelit për NBC News. Ai thotë se operacionet janë nisur në Libanin jugor.
Operacionet ishin të dizajnuara për të mbledhur informacione dhe për të hetuar pozicionet e Hezbollahut. Zyrtari paralajmëroi se operacione të tilla zgjasin me muaj dhe nuk nënkuptojnë domosdoshmërisht një sulm të afërt tokësor.
Deri më tani, shtrirja e operacionit të Izraelit në Liban ka qenë e paqartë, por zyrtarët kanë thënë se ekziston mundësia e një pushtimi tokësor për të larguar grupin militant nga kufiri. Izraeli ka zhvendosur mijëra ushtarë drejt kufirit.
Të shtunën, ushtria izraelite tha se po mobilizonte ushtarë shtesë rezervë ndërsa tensionet me Libanin përshkallëzohen. Thirrja erdhi pasi dërgoi dy brigada në Izraelin verior në fillim të kësaj jave për t’u trajnuar për një pushtim të mundshëm tokësor.
Agjencia e Kombeve të Bashkuara për Refugjatët e Palestinës (UNRWA) ka konfirmuar se lideri i Hamasit që u vra në Liban ishte një nga punonjësit e saj.
UNRWA konfirmoi për SkyNews se Fatah Sharif ishte një anëtar i stafit i cili u vendos në leje administrative pa pagesë në mars mes një hetimi pas akuzave për aktivitetet e tij politike.
Sharif ishte udhëheqësi i Hamasit në Liban dhe u vra në një sulm izraelit. Më parë, ushtria izraelite mori përgjegjësinë për vdekjen e tij. Ata pretendojnë se Sharif qëndron pas “aktiviteteve terroriste” të Hamasit në Liban.
Hamasi tha se Sharif dhe disa anëtarë të familjes së tij u vranë.
