Komisioni për Çështje të Sigurisë dhe Mbrojtjes, në mbledhjen e sotme shqyrtoi ndryshimin dhe plotësimin e Ligjit për dërgimin e Forcës së Sigurisë së Kosovës jashtë vendit.
Në takim u trajtuan edhe disa çështje të tjera përkitazi me sigurinë në vend.
Për këtë u vendos që në Komisionin për Siguri të ftohet për informim ministri i Mbrojtjes, Ejup Maqedonci, dhe ai i Brendshëm, Xhelal Sveçla.
Sipas deputetit Anton Çuni, si çështje që duhet trajtuar është shërbimet që kryhen ndaj FSK-së, si dhe largimi nga kjo forcë i pjesëtarëve të saj, dhe propozoi që për këtë të njoftojë ministri i Forcës së Sigurisë.
“Prandaj lidhur me këto dy tema propozoj të kemi për bashkëbisedim vetë ministrin e Mbrojtjes, që të shohim se sa janë të qëndrueshme dhe të sakta këto informata që po dalin në medie dhe nëse janë ku qëndron përgjegjësia dhe si të adresohen këto çështje për zgjidhje”, tha Çuni.
I të një mendimi ishte edhe deputeti Dugolli, nga radhët e LVV-së.
E deputeti Hisen Berisha kërkoi që, veç ministrit të Mbrojtjes, në Komision të vijë edhe ministri i Brendshëm, Xhelal Sveçla, për të informuar për situatën në veri, me theks të veçantë, arsyen e vendosjes së pengesave për qarkullim tek ura në Bërnjak, veçmas për kamionë.
