Sindikata e Bashkuar e Arsimit ka kërkuar procedimin e pagave të punonjësve të arsimit në Viti, të cilëve ende nuk u ka dalë paga e shtatorit.
Ndërsa Ministria e Financave dje ka njoftuar se Komuna e Vitisë nuk ka siguruar buxhetin e nevojshëm, andaj si “pasojë” punëtorët arsimit fillor dhe të mesëm privohen nga paga e muajit shtator. Kjo situatë sipas tyre ka ardhur si pasojë e disa rasteve përmbarimore që disa komuna kanë filluar të kenë.
E për këtë situatë Sokol Haliti, kryetar i komunës se Vitisë deklaroi në RTK se nuk është e vërtetë që komuna nuk i ka siguruar mjetet për pagat e punëtorëve të arsimit, sepse sipas tij mjetet kanë qenë të planifikuara.
Por ai tha se proceset përmbarimore janë pasojë e kontratës kolektive të cilën e ka nënshkruar qeveria e Kosovës.
“Komunës së Vitisë 5.5 milionë buxhet ia kanë marrë sipas kontratës kolektive që e ka nënshkruar qeveria dhe që nuk na i rimburson as nuk e abrugon vendimin që e ka nënshkruar vetë por jua bart komunave përgjegjësit dhe problematikat siç është ky rast.
Haliti tha se problemi i pagave krejtësisht është politike, dhe mos ekzekutimi i listës së pagave të arsimit është fyese.
Ai deklaroi po ashtu se niveli qendrorë nuk i ka lejuar që as kodin buxhetor ta hapin që është për mbulimin e shpenzimeve të kontratës kolektive sipas me arsyetimin se është kompetencë e qeverisë.
“Qeveria e ka nënshkruar kontratën kolektive pa na pyetur fare. Asociacioni i komunave, Bordi i asociacionit, komuna në veçanti dhe komuna e Vitisë kanë bërë 100 vërejtje dhe kërkesa për rimbursim në të gjitha instancat shtetërore. Të gjitha instancat një nga një e dinë problematikën e kontratës kolektive dhe problemet që na i sjell në krejt strukturën buxhetore”, tha Haliti.
Haliti tutje tha se 3 milionë e gjysmë euro komunës së Vitisë ju kanë marrë vetëm në vitin 2024 dhe se ndarja e re buxhetore për Vitinë është vetëm 4 euro për kokë banori.
“Jemi në situatë jo të lakmueshme. Por ju them Ministrisë së Financave dhe sektorit të thesarit se ata duhet t’i ekzekutojnë pagat. Komuna është e gatshme të zhvillojë dialog dhe t’i përmbush detyrimet e veta të cilat I ka. Ne i kemi përmbush e kemi bërë planifikimin e pagave dhe se prishjen e strukturës buxhetore e ka bërë kontrata kolektive që përgjegjësin e mban niveli qendror gjegjësisht Ministria e Financave e cila ka fonde për rimbursim”, tha Haliti.
