Në dyvjetorin e ndarjes nga jeta, në Lumbardh të Deçanit është përkujtuar veprimtari i dalluar dhe ish-komandanti i UÇK-së, Deli Leka.
Familjarë, miq e bashkëluftëtarë nderuan veprën e luftëtarit të UÇK-së, Deli Leka, në dyvjetorin e ndarjes nga jeta.
Bashkëluftëtari, Shkumbin Demalijaj, ka thënë se u përkujtua edhe një herë vepra dhe sakrifica e komandantit.
“Ka qenë një njeri i veçantë dhe strateg ushtarak i lindur dhe të njëjtën gjë e ka vazhduar edhe në Trupat Mbrojtëse të Kosovës, në Forcën e Sigurisë së Kosovës dhe në shtet-ndërtimin e Kosovës”, ka theksuar ai.
Bashkëvendësi dhe bashkëluftëtari, Zymer Ukaj, ka theksuar se ai ishte një person i veçantë.
“Mungesa e tij do të ndihet edhe shumë gjatë. Vetëm e kemi obligim ne të gjallët ta përkujtojmë edhe ta nderojmë brez pas brezi”, ka thënë ai.
Familjari, Dervish Esat Lekaj, ka thënë se sa të jetë jeta kurrë nuk e harrojnë punën dhe veprën e tij. “Si familje kemi mungesë shumë të madhe”, ka theksuar ai.
Deli Leka, njëri ndër eprorët e lartë të Forcës së Sigurisë së Kosovës ishte pjesë e celulave të para të UÇK-së në Dukagjin ndërsa u nda nga jeta tragjikisht më 4 tetor 2022.
