Në ditën e dytë të qëndrimit në Kosovë, Zëvendësndihmës sekretari i Shtetit ka zhvilluar takime me liderë opozitarë.
Këtë e kanë bërë të ditur liderët nga PDK-ja, LDK-ja dhe AAK-ja, Memli Krasniqi, Lumir Abdixhiku dhe Ramush Haradinaj.
Kreu i PDK-së, Memli Krasniqi ka shkruar se në këtë takim ka ritheksuar nevojën e shtetit të Kosovës për bashkërendim të qëndrimeve me aleatët strategjik.
“Në Ambasadën e Shteteve të Bashkuara të Amerikës, së bashku me Bedriun dhe Vlorën, takuam Zëvendësndihmës Sekretarin e SHBA-së, Alexander Kasanof. Bashkë diskutuam për zhvillimet aktuale në Kosovë dhe rajon. Në takim ritheksova nevojën e shtetit të Kosovës për bashkërendim të qëndrimeve me aleatët tanë strategjikë, e veçanërisht me SHBA-në. Kosova, si një storie suksesi është rezultat i bashkëpunimit të mirë dhe partneritetit të besueshëm me miqtë e saj”, ka shkruar ndër të tjera lideri I PDK-së opozitare.
Tutje ai ka thënë se ka falënderuar Sekretarin Kasanof për mbështetjen e vazhdueshme të SHBA-së në fuqizimin shtetit.
“Edhe e ardhmja nuk duhet të jetë ndryshe, përveçse një rrugëtim i përbashkët drejt sukseseve të reja”, ka shkruar Krasniqi.
Edhe kryetari i Lidhjes Demokratike të Kosovës, Lumir Abdixhiku, u takua me zëvendësndihmës sekretarin e Departamentit Amerikan të Shtetit, njëherit i dërguari i SHBA-ve për Ballkanin Perëndimor, Alexander Kasanof, të cilin e uroi për detyrën e re dhe i ofroi bashkëpunim të ngushtë të LDK-së në çështjet strategjike vitale për të dy vendet.
LDK në një postim në Facebook shkruan se Abdixhiku theksoi shqetësimin e LDK-së për raportin e dëmtuar të Qeverisë së Kosovës me SHBA-të, si dhe me partnerët e tjerë strategjikë politikë dhe të sigurisë.
“Kryetari Abdixhiku e siguroi Kasanof se, me formimin e qeverisë së re, të drejtuar nga LDK-ja, pas zgjedhjeve të 9 shkurtit, riparimi i këtyre raporteve do të jetë çështje e prioritetit më të lartë. Kryetari Abdixhiku, po ashtu, e njoftoi Kasanof për ecurinë e përgatitjeve për fushatën parazgjedhore, për takimet me qytetarët gjithandej Kosovës, si dhe për shtyllat kryesore të programit politik ‘Rruga e re’. Abdixhiku theksoi se partneriteti strategjik me SHBA-të në fushën e ekonomisë, të energjisë dhe të sigurisë është jetik për LDK-në dhe për Kosovën”, thuhet në njoftim.
Për takimin me emisarin Kasanof ka njoftuar edhe lideri i AAK-së Ramush Haradinaj.
“Sot në Ambasadën Amerikane takuam Zv. ndihmës Sekretarin e Shtetit, z. Alexander Kasanof. Shfrytëzova rastin që në takim t’i falënderoj z. Kasanof dhe Ambasadorin z. Hovenier për angazhimin e tyre ndaj Kosovës”, ka shkruar Haradinaj për takimin që zhvilloi në Ambasadën Amerikane.
Tutje ai ka shkruar se mbështetja e fuqishme e ShBA-së ndaj popullit të Kosovës vazhdon përkundër vështirësive të panevojshme, siç ka thënë ai, që i ka shkaktuar qeveria.
“E vetmja rrugë për të arritur synimet tona si shtet, është bashkëpunimi dhe partneriteti me SHBA-të, si aleati ynë strategjik dhe i përjetshëm”, ka përfunduar shkrimin e tij lideri i AAK-së që në takim shoqërohej nga nënkryetari i partisë Ardian Gjini e shefi i deputetëve të AAK-së Besnik Tahiri.
