Liga Pro Saudite është forcuar ndjeshëm gjatë sezoneve të fundit duke sjellë një numër të madh yjesh të huaj me paga të larta, por kjo situatë ka ndikuar në performancën e Kombëtares së Arabisë Saudite.
Trajneri i kombëtares, Roberto Mancini, është përballur me sfidën e përzgjedhjes së lojtarëve që shpesh nuk kanë minutazhë në klubet e tyre.
Me rregullat e reja që u lejojnë klubeve të nënshkruajnë deri në dhjetë lojtarë të huaj dhe të fusin deri në tetë në çdo ndeshje të Ligës Pro Saudite, shumë lojtarë të kombëtares janë lënë jashtë formës për shkak të mungesës së minutave.
“Problemi i vetëm që kemi është se tre vjet më parë të gjithë lojtarët sauditë luanin çdo ndeshje”, ka thënë Mancini. “Sot, 50-60 për qind e tyre nuk luajnë rregullisht dhe ky është problemi i vetëm që kemi”.
Arabia Saudite, e cila është në luftë për kualifikim në Kupën e Botës 2026, është mposhtur të enjten në shtëpi nga Japonia me rezultat 0-2.
