Sot do të promovohet libri “Tapitë e pronave në Vilajetin e Kosovës 1847-1912”, të autorëve Refike Sulçevsi dhe Jusuf Osmani. Sulçevsi njoftoi se në këtë libër janë mbi 1 milion e 500 mijë tapi dhe se, sipas saj, në atë kohë kishte një numër të madh të pronave në emër të femrave.
Ajo, në emisionin e mëngjesit “Mirëmëngjesi Kosovë”, tha që duket e rëndësishme të theksohet është se “ka shumë prona në emër të femrave dhe kjo tregon që në atë kohë edhe femrat kanë qenë trashëguese, si meshkujt”.
“Kemi bërë hulumtime dhe i kemi ndarë regjistrat, të cilat i takojnë Vilajetit të Kosovës, sepse në këtë libër nuk është vetëm Kosova e sotshme. I kemi regjistrat e tapive të Shkupit, të Nishit, të Prokuples, të Dranjës, të Jenipazarit dhe shumë të tjera”, tregoi ajo.
Ndër të tjera, ajo tha se në këtë libër të interesuarit mund të gjejnë të dhëna për vendbanimin e vet, “sepse këtu janë regjistrat e të gjitha fshatrave të Kosovës dhe janë të ndara në atë kohë qysh janë shkruar: mysliman dhe jomysliman, dhe çdo qytet, çdo fshat me lagje të ndara, tapitë që iu kanë takuar në atë kohë pronarëve, mund të gjenden në këtë vepër”.
“Këtu janë mbi 1 milion e 500 mijë tapi. Në kohën e Perandorisë Osmane ka pasur një administratë shumë të zhvilluar. Çdo dokument që është përgatitur dhe shkruar në atë kohë është bërë në tri kopje. Një kopje e burimit, ku është bërë dokumenti, një kopje është dërguar në qendër të mbretërisë dhe një kopje Arkivit Shtetëror të Perandorisë Osmane. Të gjitha janë të ruajtura origjinale dhe, për fat të mirë, kemi arritur sot këto të dhëna”, shtoi ajo.
Sulçevsi bëri me dije se në Agjencinë Shtetërore të Arkivave të Kosovës ruhet një numër shumë i vogël i atyre dokumenteve origjinale të asaj periudhe.
Në këtë libër janë paraqitur tapitë e pronave të hulumtuara në Arkivin e Kadastrës dhe të Tapive në Ankara, me të dhënat përkatëse për çdo vendbanim dhe kaza të Vilajetit të Kosovës, me ilustrime, dokumente, foto dhe harta.
