Kryetari i Aleancës për Ardhmërinë e Kosovës (AAK), Ramush Haradinaj ka përkujtuar ish-presidentin e Kosovës, Ibrahim Rugova në ditëlindjen e tij. Ish-kryeministri e përkujton periudhën kur kanë punuar bashkë me ish-presidentin Rugova në vitin 2004 -2005, kur Haradinaj drejtoi qeverinë.
“Presidentin Rugova e kujtojmë si një personalitet i një politike humane, paqësore, në interes dhe në mbrojtje të të drejtave të popullit të Kosovës. E kam për nder që kam punuar me të, në vitet e para të lirisë, në kohën kur kishte probleme e tema me rëndësi të madhe nacionale. Urime ditëlindja President Rugova!”, ka shkruar Haradinaj në rrjetin social Facebook.
Ndryshe, Ibrahim Rugova u lind më 2 dhjetor të vitit 1944 në Cerrcë të komunës së Istogut. Në vitin 1986 u zgjodh anëtar korrespondent i Akademisë së Shkencave dhe Arteve të Kosovës, derisa për afro dy dekada, veprimtarinë shkencore e zhvilloi në Institutin Albanologjik si hulumtues i letërsisë.
Më 1988 u zgjodh kryetar i Shoqatës së Shkrimtarëve të Kosovës, ndërsa më 23 dhjetor 1989, nga themelimi ishte kryetar i Lidhjes Demokratike të Kosovës. Më 4 shkurt 2002, Parlamenti i Kosovës zgjodhi Ibrahim Rugovën president të Kosovës, post që e ushtroi deri më 21 janar 2006 kur edhe ndërroi jetë. Rugova u varros me nderime të larta shtetërore dhe ushtarake. /Kosovatimes/
