Ministri i Financave, Hekuran Murati, ka njoftuar rihapjen e aplikimeve për Programin e Subvencionimit të Energjisë Elektrike për konsumatorët e cenueshëm për periudhën 2024/2025.
Ministri tha se, pas suksesit të vitit të kaluar, ku mbi 61 mijë familje përfituan nga subvencionimi i faturave, ky program është dizajnuar për të ndihmuar familjet me të ardhura të ulëta.
“Të drejtë aplikimi kanë familjet që jetojnë në Kosovë dhe që plotësojnë dy kritere kryesore: kanë të ardhura mujore nën 150 euro për anëtar dhe posedojnë pasuri të paluajtshme me vlerë nën 100,000 euro. Subvencioni, i cili mund të arrijë deri në 50 euro në muaj, do të aplikohet drejtpërdrejt në faturat e energjisë për periudhën tetor 2024 – mars 2025”, ka shkruar Ministri.
Ai ka njoftuar se, aplikimet mund të bëhen përmes platformës eKosova, dhe për përfitim të plotë, kërkohet që ato të dorëzohen deri më 31 tetor. /Kosovatimes/
