Qytetarët edhe më tej po ankohen se faturat e energjisë po u vijnë shtrenjtë. Ata thonë se edhe këtë dimër do të ngrohen me dru e pelet, në mënyrë që faturat e energjisë të mos u vijnë shtrenjtë. Mirëpo, procesi për përcaktimin e tarifave u cilësua si transparent nga shoqëria civile, ndonëse gjatë shqyrtimit të tyre u tha se konsumatorët nuk kanë dhënë komente.
Çmimet e energjisë elektrike po u duken të larta disa prej qytetarëve të Prishtinës.
E për shkak të tarifave aktuale, Fehmi Krasniqi thotë se shumicën e pajisjeve elektrike mundohen t’i përdorin gjatë natës, në mënyrë që të mos shpenzojnë shumë energji.
Mirëpo, procesin e përcaktimit të tarifave të energjisë elektrike e ka cilësuar transparent, konsorciumi i organizatave të shoqërisë civile “CorrWatch”.
Ndonëse në raportin e publikuar nga ky konsorcium u tha se gjatë shqyrtimit tarifor komente kanë dhënë vetëm operatorët e licencuar, dhe jo konsumatorët.
Gjatë këtij viti, Zyra e Rregullatorit të Energjisë Elektrike ka vendosur për uljen e tarifave.
Rënia e çmimeve në tregjet e energjisë elektrike në Evropë ka bërë që edhe në Kosovë sivjet tarifat të jenë më të ulëta. ZRRE ka ulur tarifat për 8% për konsumatorët familjarë dhe 3% për ata komercialë dhe industrialë.