Ylli brazilian Neymar është rikthyer më në fund në fushë, pas një mungese njëvjeçare.
Ai është aktivizuar në pjesën e dytë të ndeshjes së Al Hilal kundër Al Ain, të hënën, në kuadër të Champions League të Azisë.
Neymar ka hyrë në lojë në minutën e shtatëdhjetë e shtatë, duke zëvendësuar Nasser Al Dawsari, pak pas momentit kur Al Hilal kishte kaluar në avantazh me rezultatin 5-3. Braziliani për pak ka shënuar në një nga aksionet e tij, me një krosim nga krahu i majtë. Ndeshja ka përfunduar me fitoren e Al Hilal 5-4.
Ky ishte rikthimi i shumëpritur i Neymar, i cili nuk kishte luajtur që nga 17 tetori 2023, kur pësoi një lëndim të rëndë në gjurin e majtë gjatë humbjes së Brazilit ndaj Uruguait në kualifikimet e Kupës së Botës. Ai i ishte nënshtruar një operacioni duke kaluar një periudhë të gjatë rikuperimi. Ndeshja e fundit e Neymar për Al Hilal ishte më 3 tetor të vitit të kaluar, kur kishte shënuar golin e tij të vetëm për klubin saudit në një fitore 3-0 ndaj Nassaji Mazandaran nga Irani.
Aktualisht, Neymar mund të luajë vetëm në Champions League të Azisë dhe Kupën e Mbretit të Arabisë Saudite, pasi nuk është i regjistruar për Ligën Saudite. Kjo ndeshje pritet të jetë njëra nga të paktat para grumbullimit të tij të mundshëm me ekipin kombëtar të Brazilit për ndeshjet kualifikuese kundër Venezuelës dhe Uruguait në nëntor.
