Sulmuesi i Bayer Leverkusen dhe Nigerisë, Victor Boniface, do të mungojë në ndeshjen e së mërkurës në Champions League kundër Brest, pas një aksidenti në komunikacion që ka ndodhur të dielën.
Boniface nuk është stërvitur me ekipin të martën dhe sipas mediave gjermane, ai nuk ishte në aeroplanin që ka udhëtuar për në Francë pasdite.
Të dielën, Boniface ishte përfshirë në një aksident kur makina me të cilën udhëtonte është përplasur me një kamion në autostradë.
Drejtori sportiv i Leverkusen, Simon Rolfes, u ka thënë gazetarëve të martën se Boniface ka shpëtuar pa lëndime të rënda, por pjesëmarrja e tij në ndeshjen e ardhshme është në pikëpyetje.
“Ende është e pasigurt për momentin, një situatë e tillë nuk është e lehtë dhe ai duhet ta kapërcejë këtë”, ka thënë Rolfes. “Ne të gjithë jemi shumë të lumtur që nuk i ndodhi asgjë serioze.”
Boniface ka shënuar shtatë gola në 10 ndeshje në të gjitha garat këtë sezon. Zëvendësuesi i tij i mundshëm, sulmuesi çek Patrik Schick, ka shënuar një gol në tetë ndeshje në të gjitha kompeticionet.
