Profesori i në Universitetin Adger, Abit Hoxha, ka folur për mesazhet e zyrtarit të lartë amerikan, James O’Brien, sidomos për Asociacionin. Ai ka thënë se tejkalimi i kësaj situatë duhet të bëhet nëpërmjet Gjykatës Kushtetuese. Sipas tij, as nga ana e Kosovës, as nga Serbia nuk ka interesim për avancimin e dialogut.
Profesori Hoxha ka thënë se çështja e Asociacionit të komunave me shumicë serbe është demonizuar tepër. Në “Lajmet e Fundit” në RTK, ai ka deklaruar se veprimet e Qeverisë Kurti pa koordinim me ShBA-në, edhe pse ishin legale, kanë qenë në kundërshtim me interesin e Kosovës.
“Nuk është se Kosova nuk ka të drejtë të veprojë në veri, përfshirë që nga koha e tabelave të veturave, por ishte koha jo e duhur për Kosovën”, ka theksuar Hoxha.
Duke folur për kriminelin Milan Radoiçiq, Hoxha ka theksuar se Serbia nuk do ta dorëzojë atë. Sipas tij, kërkesa për dorëzimin e tij, është shterpe dhe pretekst për të shtyrë ngjarjet tjera që të krijohen pengesa.
“Tanimë është e qartë se as nga ana e Kosovës, as nga ana e Serbisë nuk ka interes avancimi i dialogut”, ka thënë Hoxha.